Украинада урушни тўхтатиш ва тинчлик келишувига келишиш масаласида тўсиқни Москва эмас, Киев яратаяпти, деди АҚШ президенти Доналд Трамп Reuters агентлигига берган интервьюсида. Суҳбат 14 январь куни Овал кабинетда бўлиб ўтгани, материал эса 15 январь куни эълон қилингани қайд этилган.
Трампнинг айтишича, Россия президенти Владимир Путин “келишув қилишга тайёр”, Украина президенти Владимир Зеленский эса “келишув тузишга нисбатан камроқ тайёр”.
Reuters мухбирлари АҚШ раҳбаридан: “Нима учун АҚШ бошчилигидаги музокаралар ҳали ҳам Иккинчи жаҳон уруши тугаганидан бери Европадаги энг йирик можарони ҳал қила олмади?” деган саволни берганда, Трамп қисқа жавоб қайтарган: “Зеленский”. Қолган тафсилотларни у очиқламаган.
Бироқ шу ўринда Reuters аввалроқ келтирган муҳим фон ҳам бор. Агентлик 2025 йил декабрь ойида манбаларга таяниб, АҚШ разведкаси баҳосига кўра, Путин омма олдида тинчлик ҳақида гапираётганига қарамай, уруш мақсадларини тубдан ўзгартирмагани, ҳали ҳам Украина ҳудудини тўлиқ назорат қилишга интилаётгани ҳақида хабар берган.
Ушбу хулосалар кўп жиҳатдан Европа махсус хизматлари баҳолари билан ҳам мос келиши айтилган — яъни “гап бошқа, ният бошқа” деган шубҳа Ғарбда ҳали ҳам тирик.
Европа томонидан айтилган баҳолар ҳам шу манзарага яқин. Германия ташқи ишлар вазири Йоханн Вадефул декабр ойидаги баёнотида Путин тинчлик музокараларини бошламаслик учун изчил равишда баҳоналар қидираётганини, шу сабаб унинг музокараларга чиндан ҳам жиддий ёндашишига ишонмаслигини билдирган.
Хулоса қилиб айтганда, ҳозир майдонда икки хил тасвир бор: Трамп “Киев секин”, “Москва тайёр” дейди; разведка ва Европа дипломатияси эса “Путиннинг уруш мақсадлари ҳали ўзгармаган” деган сигнални беряпти. Энди реал олға силжиш бўладими-йўқми, асосий савол — баёнотлар эмас, шартлар ва кафолатлар қандай кўриниш олишида. Чунки тинчлик — пост, интервью ёки шов-шув эмас; у қоғоздаги аниқ мажбуриятлардан бошланади.
“Zamin”ни Telegram'да ўқинг!
