Ирландиялик UFC юлдузи Конор Макгрегор Telegram асосчиси Павел Дуров ҳақида ўта таъсирли ва кескин баёнот берди. Унинг сўзларига кўра, ҳукуматлар дунё бўйлаб эркинлик “гайкаларини” тобора қаттиқроқ бураётган бир пайтда, Telegram ортида турган асосий куч сифатида Дуровга ҳурмат билдириш керак.
Макгрегор Дуровни “ҳақиқий жангчи” деб атади ва унинг йўли оддий бизнес-ҳикоя эмас, балки махфийлик ҳамда сўз эркинлиги учун кураш эканини таъкидлади. У Telegram асосчисининг фойдаланувчи маълумотларини сотиш ёки тақдим этишдан бош тортгани учун Россиядан чиқарилганини, шундан кейин эса айнан махфийлик тамойилига суянган ҳолда катта платформани барпо этганини эслади.
UFC юлдузининг фикрича, бугун Дуров Европа Иттифоқидаги қатор қоидаларни ҳам очиқ танқид қилиб, инновацияларга нисбатан “жазоловчи” ёндашувларни фош қилиб келяпти. Макгрегор буни “махфийликка қарши уруш” деб баҳолади ва Дуровнинг асосий огоҳлантиришига урғу берди: эркин интернетни ялпи кузатув ва цензура хавфидан сақлаб қолиш учун вақт тобора камайиб бораяпти.
Макгрегор, шунингдек, Дуровга нисбатан босимлар кучайганини ҳам тилга олди. Унинг айтишича, ҳатто Францияда ҳибсга олингани ва эркинлик мавзусидаги форумларда чиқишлари чекланганидан кейин ҳам, Дуров ўз позициясидан қайтмаган. Макгрегор бу ҳолатни қатъият намунаси сифатида кўрсатиб, Telegram асосчиси зарарли контентни олиб ташлаш бўйича чоралар кўрган бўлса-да, ўз принципларини “сотмагани”ни таъкидлади.
Баёнотнинг энг эмоционал қисми эса Макгрегорнинг шахсий муносабати бўлди. У Дуровни “афсона” деб атаб, уни “азиз дўстим ва содиқ биродарим” дея таърифлади ҳамда “мен сен билан 100% биргаман” деган фикрни қаттиқ туриб айтди.
Эслатиб ўтамиз, Павел Дуров 2014 йил апрель ойида Россия ҳукумати томонидан украиналик фойдаланувчилар ва намойишчилар ҳақидаги маълумотларни топшириш талаби қўйилганидан сўнг, бу талабни бажаришдан бош тортгани ортидан мамлакатдан чиқарилган эди. Шу воқеадан кейин Telegram’нинг махфийликка таянган сиёсатини Дуров ўз брендининг асосий устунига айлантирди.
“Zamin”ни Telegram'да ўқинг!
