Буюк Британияда сил касаллиги (туберкулёз) билан боғлиқ вазият жиддий тус олмоқда. Соғлиқни сақлаш хавфсизлиги агентлиги маълумотларига таяниб Daily Express нашрининг хабар беришича, мамлакатда 2022 йилдан буён хасталикка чалинганлар сони 25 фоизга ошган.
Сўнгги йилларда касаллик динамикаси қуйидагича кўриниш олган:
- 2024 йилда: 5 480 та ҳолат (энг юқори кўрсаткич);
- 2025 йилда: 5 424 та ҳолат қайд этилган.
Мутахассислар айниқса Англиянинг шимоли-шарқий ҳудудларида вазият анча хавотирли эканидан огоҳлантиришмоқда.
Суррей университетининг бактериология бўйича эксперти Сьюзи Хингли-Уилсоннинг таъкидлашича, касаллик кўпайишининг асосий сабабларидан бири — диагноз қўйиш ва даволашни бошлаш муддатининг чўзилиб кетаётганидадир. Инсон ўзида аломатларни сезган вақтдан то шифокорга мурожаат қилиб, муолажа олгунга қадар ўтган давр оралиғи кенгайган. Бу эса инфекциянинг жамият ичида янада кенгроқ тарқалишига шароит яратмоқда.
Экспертлар хасталик авж олишини аҳолининг турмуш даражаси пасайиши билан ҳам боғлашмоқда.
Жозеф Роунтри жамғармаси ҳисоб-китобларига кўра, ҳозирда Буюк Британияда қарийб 14,2 миллион киши қашшоқлик чегарасидан паст ҳолатда кун кечирмоқда. Паст турмуш даражаси ва ночорлик эса сил каби ижтимоий касалликларнинг илдиз отишига асосий замин бўлиб хизмат қилади.
“Zamin”ни Telegram'да ўқинг!
