Reuters хабарига кўра, АҚШ томонидан Украинага энергия йўналиши учун ваъда қилинган қарийб 250 миллион доллар ҳалигача ажратилмаган. Гап шундаки, бу пуллар қишнинг қақшатаётган палласида Украинага суюлтирилган газ импортини қўллаб-қувватлаш ва зарбалардан зарар кўрган энергетика инфратузилмасини тиклашга “кислород” бўлиши керак эди.
Манбада айтилишича, маблағларнинг камида бир қисми аввал USAID орқали йўналтирилиши режалаштирилган. Аммо Доналд Трамп маъмуриятининг илк ҳафталарида агентлик фаолияти кескин қисқартирилиб, натижада пул “қоғозбозлик лабиринти”да илиниб қолгани ҳақида баҳслар кучайган.
Энг қизиғи — ҳозир гап пулнинг ўзига эмас, “ким тарқатади?” деган саволга бориб тақалган. The White House атрофидаги айрим амалдорлар маблағни АҚШ Давлат департаменти орқали чиқаришни маъқул кўрган, бошқалар эса бу вазифани АҚШ Халқаро тараққиёт молия корпорациясига беришни таклиф қилган. Reuters қайдича, айнан шу идора Украина тикланишида келажакда муҳим рол ўйнаши мумкин бўлган, кўпчиликка унчалик таниш бўлмаган федерал тузилма сифатида тилга олинади.
Бу ҳолатнинг “эртага”си ҳам бор: энергия пуллари ушланиб турган бир пайтда, АҚШ томони Украинадаги стратегик тармоқларга (жумладан, муҳим минераллар ва инвестиция лойиҳалари) доир механизмларни фаоллаштираётгани ҳақида сигналлар ҳам кўриняпти. Яъни Вашингтонда приоритетлар тарозиси “энергияни зудлик билан қутқариш”дан “узоқ муддатли иқтисодий лойиҳа”ларга оғиб кетмаяптими, деган саволлар пайдо бўляпти.
Қисқаси, фронт ортидаги энергия жангларида ҳамма нарса трансформатор ва газ билан эмас — қайси идора имзо қўя олиши билан ҳам ҳал бўляпти. Ва бу бюрократия совуқда яна ҳам қаттиқроқ сезилади.
“Zamin”ни Telegram'да ўқинг!
