Амалдаги UFC чемпиони Ислом Махачев Белградга расмий ташрифи чоғида Сербия президенти Александр Вучич билан учрашди. Учрашув спорт мухлислари учун ҳам, жамоатчилик учун ҳам қизиқ воқеага айланди: россиялик жангчи президентга чемпионликни қўлга киритганида кийган қўлқопларини совға қилди.
Вучич бу учрашувни алоҳида илиқ кайфиятда қабул қилди ва Махачевни жуда юқори баҳолади. Унинг сўзларига кўра, Ислом — зўр спортчи, жаҳон чемпиони ва у учратган энг машҳур ҳамда энг кучли инсонлардан бири. Президент бу мулоқотни ўзи учун завқ ва шараф деб атади. Айниқса, совға қилинган қўлқоплар Махачевнинг сўнгги жангида ишлатилгани қайд этилди — бу эса оддий эсдалик эмас, чемпионлик руҳи билан боғлиқ символик совға, десак тўғри бўлади.
Учрашув фақат “фото ва совға” билан чекланиб қолмади. Томонлар соғлом жамият қуришда спортнинг ўрни, машҳур спортчиларнинг ёшларга таъсири ҳақида ҳам гаплашган. Вучич таъкидлаганидек, етакчи атлетлар ёшларни интизом, масъулият ва матонатга ундайди — яъни спорт фақат медаль ёки белбоғ эмас, балки характер мактаби ҳам.
Шунингдек, Сербия раҳбари мамлакат спорт ва ёш истеъдодларни қўллаб-қувватлашда давом этишини, спорт ҳақиқий қадриятларни, ўзаро ҳурматни тарғиб қилиши ва турли халқларни бирлаштиришини айтиб ўтди. Яъни бу учрашув ортида каттароқ ғоя бор: спорт — турли давлатлар, турли қарашлар ўртасида “умумий тил” бўла олади.
Якунда Александр Вучич Ислом Махачевга келгусида ҳам ғалабалар тилади: октагонда ҳам, ҳаётда ҳам энг катта мақсадларига етиб боришини истади. Мухлисларга эса битта сигнал аниқ: чемпионнинг обрўси октагондан ташқарида ҳам кучли ва бу ҳолат унинг номини янада кенгайтиряпти.
“Zamin”ни Telegram'да ўқинг!
