АҚШ президенти Доналд Трампнинг махсус вакили Стивен Уиткофф Украинада тинчликка эришиш бўйича ҳаракатлар доирасида муҳим сигнал берди. У Fox News эфиридаги чиқишида Украина президенти Володимир Зеленский ва Россия президенти Владимир Путин яқин орада шахсан учрашиши эҳтимолини истисно қилмаслигини айтди. Унинг таъкидлашича, АҚШ томонининг саъй-ҳаракатлари ҳатто яқин 3 ҳафта ичида шундай учрашувга олиб келиши ҳам мумкин.
Уиткоффнинг сўзларига кўра, у ва Трампнинг куёви Жаред Кушнер “оптимистик кайфиятда”. Улар икки томонга ҳам таклифлар киритилганини, бу таклифлар яқин ҳафталар ичида позицияларни бир-бирига яқинлаштириши мумкинлигини айтмоқда. Мақсад — раҳбарлар даражасидаги мулоқотга йўл очиш.
Бундан ташқари, Уиткофф эҳтимолий сценарийлардан яна бирини ҳам рад этмади: агар тинчлик келишуви учун реал имконият кўринса, уч томонлама — Зеленский, Путин ва Трамп иштирокида учрашув бўлиши мумкин. Аммо у бу ерда битта шартни очиқ айтди: Трамп фақат “ишни охиригача етказиб, энг яхши натижага чиқиш”га ишонса, шундай саммитда қатнашиши мумкин.
Шу билан бирга, Уиткофф Путин билан бир неча бор шахсан кўришгани учун билдирилган танқидларга ҳам муносабат билдирди. Унинг фикрича, қарши томон позициясини тушунмасдан туриб келишув тузиб бўлмайди: мотивация, мақсад ва “қизил чизиқлар”ни аниқ билиш зарур. Уиткофф Путин билан учрашувларда Россия раҳбари ўз позициясини очиқ айтганини ҳам қўшимча қилган.
Украина томонидан эса позиция аввалдан маълум: Зеленский бир неча бор Путин билан шахсан учрашишга тайёрлигини билдирган, бироқ Москвага бориш ҳақидаги чақириқларни рад этган ва жавобан Киевга таклиф қилган. Шунингдек, у музокарачи жамоасига раҳбарлар даражасидаги учрашув масаласини Женевада кўтаришни топширгани ҳақида ҳам хабар берилган.
Қисқаси, Вашингтон “яқин ҳафталарда яхши янгиликлар” бўлишидан умидвор. Лекин вазият шунчаки баёнотлар билан ҳал бўладиган даражада эмас: олдинда ҳали кўп савол, кўп шарт ва энг муҳими — томонларнинг ҳақиқий тайёрлиги туради. Шу сабаб ҳам, агар саммит ҳақиқатдан яқинлашса, у катта эҳтимол билан узоқ музокаралар, қаттиқ тортишувлар ва қийин қарорлар фонида бўлади.
“Zamin”ни Telegram'да ўқинг!
