АҚШ президенти Дональд Трамп ва унинг махсус вакили Стив Уиткофф Россиянинг Эронга кўрсатаётган гўёки ёрдами масаласига тўхталиб ўтди. Гап шундаки, аввалроқ Тҳе Wашингтон Пост нашри Россия Эрон томонига АҚШнинг Яқин Шарқдаги ҳарбий объектлари ҳақида махфий маълумотларни узатаётгани ҳақида хабар тарқатган эди. Ушбу маълумотларга кўра, Россия томонидан тақдим этилган аниқ координаталар Эроннинг ҳужумлар самарадорлигини оширишга хизмат қилаётган бўлиши мумкин.
Президент Трамп журналистлар билан суҳбатда бу хабарларга эҳтиёткорлик билан ёндашди. У Россия ҳақиқатан ҳам Эронга ёрдам бераётганини аниқ билмаслигини, бироқ бу ёрдам бўлса ҳам, Эроннинг ҳарбий ҳолатини сезиларли даражада яхшиламаганини таъкидлади. Трампнинг сўзларига кўра, АҚШ Эроннинг ҳарбий салоҳиятини аллақачон жиддий даражада заифлаштирган ва Россиянинг ҳар қандай ҳаракати ҳам вазиятни ўзгартира олмайди.
Стив Уиткофф эса Россиядан АҚШ ҳарбий объектлари ҳақидаги маълумотларни Эронга тақдим этмасликни қатъий сўради. Экспертлар Эроннинг сўнгги пайтларда амалга оширган зарбалари жуда аниқ ва мақсадли эканлигини қайд этишмоқда. Уларнинг фикрича, Эрон қўмондонлик марказлари ва назорат тизимларини йўқ қилишда аввалгига қараганда анча самаралироқ ҳаракат қилмоқда. АҚШ Мудофаа вазирлиги эса ушбу вазият юзасидан ҳозирча расмий изоҳ беришдан сақланиб қолмоқда.
“Zamin”ни Telegram'да ўқинг!
