Жаҳон нефть бозори бир нечта тор денгиз йўлакларига ўта қарам бўлиб қолган. АҚШ Энергетика ахборот бошқармаси маълумотларига кўра, 2025 йилнинг биринчи ярмида дунё бўйлаб денгиз орқали ташиладиган нефтьнинг асосий қисми айнан шу стратегик нуқталар орқали ўтган. Жами 73 миллион баррелга яқин хомашё ҳар куни ушбу тор йўлаклар орқали жаҳон бозорларига етказиб берилади. Бу ҳақда naked-science.ru хабар беради.
Энг муҳим йўналиш сифатида Малакка бўғози қайд этилган. Бу ерда кунига 23,2 миллион баррель нефть ташилади, бу жаҳон денгиз савдосининг қарийб 29 фоизини ташкил этади. Мазкур йўл Хитой, Япония ва Жанубий Корея каби йирик иқтисодиётлар учун ҳаётий аҳамиятга эга. Шунингдек, Эрон ва Уммон ўртасидаги Ҳормуз бўғози ҳам глобал энергия хавфсизлиги учун ўта муҳим саналади. Ушбу бўғоз орқали дунё нефть истеъмолининг бешдан бир қисми ўтади ва ҳар қандай геосиёсий кескинлик нефть нархларининг кескин ўзгаришига олиб келиши мумкин.
Бундан ташқари, Сувайш канали, Боб ал Мандаб бўғози ҳамда Европадаги Дания ва Туркия бўғозлари ҳам нефть логистикасида катта ўрин тутади. Россия ва Каспий минтақасидан экспорт қилинадиган нефть айнан шу йўллар орқали жаҳон бозорига чиқади. Мутахассисларнинг фикрича, ушбу стратегик нуқталардаги ҳар қандай блокировка ёки можаролар глобал энергетика тизимини издан чиқариши ва хомашё нархларининг беқарорлашувига сабаб бўлиши мумкин.
[media=https://www.googletagmanager.com/ns.html?id=GTM-PFD3FQP] “Zamin”ни Telegram'да ўқинг!
