Эроннинг Минаб шаҳрида жойлашган мактабга берилган зарба урушнинг энг фожиали ва баҳсли рамзларидан бирига айланди. Халқаро ахборот воситалари бу ҳужум ортида ким тургани ҳақида турли маълумотларни келтирмоқда.
Reuters ахборот агентлиги тарқатган хабарга кўра, мактабга катта эҳтимол билан Америка Қўшма Штатлари ҳарбийлари томонидан зарба берилган бўлиши мумкин. Шу билан бирга, The New York Times нашри мактабга қилинган ҳужум унинг ёнида жойлашган ҳарбий объектга берилган зарба билан бир вақтга тўғри келганига эътибор қаратган.
Расмий Вашингтон эса бу воқеа юзасидан текширув ўтказилаётганини маълум қилиб, фуқаролик иншоотига атайлаб зарба берилгани ҳақидаги айбловларни рад этмоқда. Бироқ ҳозирча Америка томонидан бу масала бўйича аниқ далиллар тақдим этилмагани ҳам таъкидланмоқда.
Эрон рон 7 март куни БААдаги АҚШнинг Ал-Дарфа ҳарбий базасига зарба берди. Теҳронга кўра, айнан шу база Минабдаги мактабга уюштирилган ҳужумда иштирок этган бўлиши мумкин.
Эрон Қуролли кучлари бош штаби тарқатган маълумотларга қараганда, мазкур базага қилинган зарба натижасида ҳалок бўлган ва жароҳат олган Америка ҳарбийларининг сони 200 нафардан ошган бўлиши мумкин.
Айни пайтда ушбу базага қилинган ҳужум ҳақидаги хабарлар тарқалган пайтда Америка собиқ президенти Дональд Трамп Эронга нисбатан “жуда кучли зарбалар” берилиши мумкинлигини айтгани ҳам қайд этилмоқда. Айрим кузатувчилар бу баёнотни Америка ҳарбийлари орасида жиддий йўқотишлар бўлган бўлиши мумкинлиги билан боғлашмоқда.
Бу уруш давомидаги энг баҳсли баёнотлардан бири эса Исроил бош вазири Биньямин Нетаньяху томонидан айтилди. Унинг таъкидлашича, у ва Дональд Трамп биргаликда “дунёни қутқариш” вазифасини бажараётган эмиш. Қизиғи шундаки, бу гаплар мутлақо жиддий оҳангда айтилган.
Кузатувчиларнинг айтишича, “дунёни қутқариш операцияси” бошланишидан аввал дунёдаги вазият бугунги кунга нисбатан анча тинч эди.
Шу орада Эрон ташқи ишлар вазири Аббос Ароқчи Америка телеканалларидан бирига интервью берди. Суҳбат давомида журналист ундан: “Мамлакатингизга Америка ҳарбийлари қуруқлик орқали ҳужум қилиши мумкин. Бундан қўрқмайсизми?” дея савол берди.
Ароқчи бу саволга кескин жавоб бериб, “Йўқ, аксинча. Биз уларни кутаяпмиз”, дея таъкидлади. Бу баёнот айрим таҳлилчилар томонидан жуда қатъий чақириқ сифатида баҳоланмоқда.
Кўпчилик урушни қоралаётган бўлса-да, айрим кузатувчилар фикрича, масофадан туриб ракета отиб чекинишдан кўра, юзма-юз жанг қилиш анча очиқ ва тўғридан-тўғри кураш ҳисобланади.
Шу билан бирга, баъзи таҳлилчилар Америка қўшинлари бундай сценарийга журъат қилиши қийин бўлиши мумкинлигини таъкидламоқда. Чунки Эрон ҳудудига кириб жанг қилиш оддий ҳарбий операция эмас, балки жуда мураккаб ва катта хавф-хатарлар билан боғлиқ жараён ҳисобланади.
Бир кишини ўлдириш билан иш битганида эди, Эрон аллақачон қулаган бўлар эди. АҚШ ҳеч қачон бошланмаслиги керак бўлган урушни бошлаб қўйди. Энди уни қандай тугатишни билмаяпти.
“Zamin”ни Telegram'да ўқинг!
