Буюк Британия Бош вазири Кир Стармер Яқин Шарқда кескин тус олаётган вазият юзасидан мамлакатнинг расмий нуқтаи назарини очиқ баён қилди.
Унинг таъкидлашича, Эрон ва Исроил ўртасида кучайиб бораётган ҳарбий тўқнашув Лондон учун устувор масала ҳисобланмайди.
“Бу бизнинг урушимиз эмас. Биз ушбу можарога жалб этилмаймиз. Бу Британиянинг миллий манфаатларига мос келмайди”, — деди Стармер қатъий оҳангда.
Бош вазирнинг мазкур баёноти Лондоннинг эҳтимолий ҳарбий иштирок масаласига ойдинлик киритди. Шу билан бирга, у Британиянинг ташқи сиёсатда эҳтиёткор ва манфаатларга асосланган ёндашувни сақлаб қолаётганини кўрсатди.
Сиёсатшунослар фикрича, расмий Лондон ҳозирча можарони дипломатик йўл билан ҳал этиш тарафдори бўлиб, тўғридан-тўғри ҳарбий аралашувдан ўзини тийишга интилмоқда.
“Zamin”ни Telegram'да ўқинг!
