Австралиядаги йирик нефт заводида ёнғин: нима юз берди?
Австралиянинг Жилонг шаҳридаги Viva Energy нефт заводида кучли ёнғин юз берди. Аланга бензин сақланадиган бўлимда ёнилғи сизиб чиқиши ва портлашлар натижасида бошланган. Ҳозирда ёнғин бартараф этилган, бироқ воқеа туфайли завод фаолияти қисман чекланди. Бу ҳолат бензин ва бошқа ёнилғи турлари ишлаб чиқариш ҳажмининг камайишига олиб келиши мумкин.
Австралияда йирик саноат ҳодисаси қайд этилди. 16 апрель кунига ўтар кечаси Жилонг шаҳрида жойлашган нефтни қайта ишлаш корхоналаридан бирида кучли ёнғин юз берди. Бу ҳақда ABC телеканали маълум қилди.
Маълум қилинишича, воқеа Viva Energyга тегишли заводда содир бўлган. Ҳозирча расмийлар ҳодисани бахтсиз тасодиф сифатида баҳоламоқда. Крис Боуеннинг таъкидлашича, дастлабки текширувлар давомида қасддан ўт қўйиш ёки бошқа шубҳали ҳолатлар аниқланмаган.
Ёнғин хавфсизлиги хизматлари маълумотига кўра, аланга бензин сақланадиган бўлимда бошланган. Эҳтимол, ушбу ҳудудда ёнилғи сизиб чиқиши ортидан бир неча портлашлар содир бўлган ва бу ҳолат ёнғиннинг тез тарқалишига сабаб бўлган.
Ҳозирда ёнғин тўлиқ бартараф этилган бўлса-да, мутахассислар унинг оқибатлари жиддий бўлиши мумкинлигини таъкидламоқда. Хусусан, завод фаолияти қисман чекланиши туфайли бензин ишлаб чиқариш ҳажми камайиши эҳтимоли бор.
Маълум қилинишича, эҳтиёт чораси сифатида корхона дизел ёнилғиси ва авиа керосин ишлаб чиқаришни вақтинча қисқартирган ҳолда давом эттирмоқда.
Изоҳлар 0
…