Эрон жанубидаги Ҳурмузгон провинциясида Форс кўрфази қирғоғида 150 мингдан ортиқ аҳолига мўлжалланган янги йирик шаҳар барпо этилиши режалаштирилмоқда. Мазкур лойиҳа “Марказий Макран (Макран-е Маркази)” деб номланган бўлиб, у янги авлод шаҳри сифатида тасвирланмоқда.
Эрон давлат телевидениеси хабарига кўра, мамлакат Олий шаҳарсозлик ва архитектура кенгаши ушбу шаҳар бош режасининг техник-иқтисодий асослари, жойлашув ҳудуди ҳамда умумий қурилиш тамойилларини тасдиқлаган.
Режага мувофиқ, янги шаҳар Абкуҳи ва Калирак аҳоли пунктлари яқинида қурилади. У денгиз иқтисодиёти, энергия ишлаб чиқариш ва саноат инфратузилмасига йўналтирилган марказга айланиши кутилмоқда.
Лойиҳа доирасида шаҳар майдони 3200–3500 гектарни ташкил этиши, аҳолиси эса босқичма-босқич 150 мингдан 175 минг нафаргача етиши режалаштирилган.
Расмий маълумотларда таъкидланишича, қурилиш жараёнида экологик мувозанатни сақлаш, атроф-муҳитни муҳофаза қилиш, хусусий секторни жалб қилиш ҳамда маҳаллий аҳолининг ижтимоий-иқтисодий имкониятларини кенгайтиришга алоҳида эътибор қаратилади.
Мутахассислар бу лойиҳани Эроннинг Форс кўрфази бўйидаги стратегик урбан ривожланиш режаларидан бири сифатида баҳоламоқда.
“Zamin”ни Telegram'да ўқинг!
