Украина пойтахти Киевда содир бўлган ҳалокатли отишма воқеасидан сўнг мамлакат патрул полицияси раҳбари Евҳен Жуков лавозимидан истеъфога чиқди. Бунга воқеа вақтида икки нафар полиция ходими фуқароларни ҳимоя қилмай, ҳодиса жойидан қочгани ҳақидаги айбловлар сабаб бўлган.
Ҳодиса шанба куни шаҳарнинг Ҳолосивский туманида юз берди. Қуролланган шахс кўчада одамларга ўқ узиб, кейинчалик супермаркетда бир нечта кишиларни гаровга олган. Натижада олти киши ҳалок бўлиб, 14 киши жароҳат олган. Ҳужумчи эса полиция билан тўқнашувда йўқ қилинган.
Ички ишлар вазири Игор Клименко мазкур полициячилар вақтинча хизматдан четлатилганини ва уларнинг ҳаракатлари юзасидан тергов олиб борилаётганини маълум қилди. Президент Володимир Зеленский эса уларни “ҳаракатсизликда” айблаб, жиноят иши қўзғатилганини билдирди.
Расмийлар ушбу воқеани террорчилик ҳаракати сифатида баҳоламоқда. Ҳужумчининг руҳий ҳолати беқарор бўлгани айтилмоқда. Ҳозирда бир неча жабрланганлар шифохонада даволанишда давом этмоқда.
Мазкур ҳодиса уруш давом этаётган Украинада кам учрайдиган қуролли ҳужумлардан бири сифатида жамоатчиликда катта резонанс уйғотди.
“Zamin”ни Telegram'да ўқинг!
