Япония полигонида танк портлади
Япониянинг Хижудай полигонида танк машғулотлари вақтида кучли портлаш содир бўлди. Оқибатда уч нафар ҳарбий хизматчи ҳалок бўлиб, яна бири турли даражада жароҳатланди. Дастлабки маълумотларга кўра, портлаш снаряд отишдан олдин номаълум сабаблар билан юз берган. Мутахассислар ҳодисани техник носозлик ёки ўқ-дориларнинг яроқсизлиги билан боғламоқда, тергов ишлари олиб борилмоқда.
Япониянинг жануби-ғарбий ҳудудида жойлашган ҳарбий машғулот майдонида юз берган кучли портлаш фожиага сабаб бўлди. Ҳодиса оқибатида уч нафар ҳарбий хизматчи ҳалок бўлиб, яна бир нафари турли даражадаги жароҳатлар олди.
Маҳаллий ОАВ, жумладан Kyodo News хабарига кўра, воқеа 21 апрель куни Оита префектурасидаги Хижудай полигонида танк машғулотлари давомида содир бўлган. Дастлабки маълумотларга қараганда, танк снаряди отиш жараёнидан олдин кутилмаганда портлаб кетган.
Ҳалок бўлган ҳарбийларнинг икки нафари 30 ёшлар атрофида, яна бири 40 ёшга яқин бўлгани айтилмоқда. Улар машғулот вақтида танк командири, тўпчи, хавфсизлик бўйича масъул ҳамда ҳайдовчи вазифаларини бажараётган бўлган.
Япония Мудофаа вазири Синдзиро Коидзуми Токиода журналистлар билан бўлган учрашувда ушбу ҳодисани “ниҳоятда ачинарли” дея баҳолаб, воқеа сабаблари чуқур ўрганилаётганини таъкидлади. Унинг сўзларига кўра, келгусида бундай ҳодисаларнинг олдини олиш мақсадида хавфсизлик чораларини янада кучайтириш режалаштирилмоқда.
Фавқулодда хизматлар берган маълумотга кўра, жароҳатланган ҳарбий ҳушида бўлиб, унга зудлик билан тиббий ёрдам кўрсатилган. Бироқ унинг юз қисмида куйиш излари борлиги қайд этилган.
Мутахассислар мазкур ҳодисани техник носозлик ёки ўқ-дориларнинг яроқсизлиги билан боғлиқ бўлиши мумкинлигини тахмин қилмоқда. Ҳозирда тергов ишлари олиб борилиб, портлашнинг аниқ сабаблари аниқланмоқда.
Изоҳлар 0
…