Россия президенти Владимир Путин Украинага қарши давом этаётган ҳарбий операция муваффақияти учун бутун мамлакат аҳолиси бирдек ишлаши зарурлигини таъкидлади. У бу урушни яна бир бор Совет Иттифоқининг 1941–1945 йиллардаги Германияга қарши улуғ ватан урушига қиёслади.
Москвада бўлиб ўтган “Кичик ватан — Россия кучи” форумида сўзлаган Путин, ўша даврда фронт орти ҳам тўлиқ фронт учун ишлаганини эсга олди. Унинг айтишича, ўшанда фақат ҳарбий техника эмас, балки бутун жамият фронтни қўллаб-қувватлаган.
“Улуғ Ватан уруши даврида бутун фронт орти фронт учун, аскарларимиз учун, ҳимоячиларимиз учун ишлаган. Аммо фақат танклар, самолётлар, тўплар ва снарядларгина ишлаб чиқарилмаган”, — деди Путин.
Путин тарихий мисоллар келтирар экан, болалар, аёллар ва кексаларнинг ҳам фронт учун меҳнат қилганини алоҳида таъкидлади — кимдир пайпоқ тўқиган, кимдир эса посилка ва совғалар юборган.
Россия президентининг фикрича, айнан шу умумий бирлик ғалабанинг асосий омили бўлган ва ҳозирги вазиятда ҳам худди шундай ёндашув керак бўлади.
“Бизнинг ғалабаларимиз муваффақияти айнан шундай бирликда. Ҳозир ҳам шундай бўлади”, — деди Россия президенти.
Бироқ жамоатчилик кайфиятида бошқа тенденция ҳам кузатилмоқда. “Левада-марказ” сўровига кўра, россияликларнинг 67 фоизи Украина билан тинчлик музокаралари бошланишини қўллаб-қувватламоқда.
Шу билан бирга, ҳарбий ҳаракатларни давом эттириш тарафдорлари сони кескин камайиб, 24 фоизга тушган — бу эса кузатувлар тарихидаги энг паст кўрсаткич ҳисобланади.
Сўровлар яна шуни кўрсатадики, уруш ҳақида фаол кузатув олиб бораётган аҳоли улуши ҳам камайиб, 44 фоизга тушган. Шу пайтда оммавий ахборот воситалари Путин рейтингининг ҳам бир неча ҳафта кетма-кет пасайиб бораётганини қайд этмоқда.
“Zamin”ни Telegram'да ўқинг!
