Яқин Шарқдаги геосиёсий вазият янада мураккаблашмоқда. Эрон расмийлари АҚШ билан ўт очишни тўхтатиш бўйича келишувни узайтириш масаласида қатъий позиция билдирди.
Tasnim тарқатган маълумотларга кўра, Теҳрон ҳукумати Доналд Трампдан сулҳ муддатини узайтиришни сўрамаган. Аксинча, Эрон томони АҚШни “можарода устунликка эриша олмаган тараф” сифатида баҳоламоқда.
Манбаларга кўра, Теҳрон Вашингтон ҳарбий йўл билан мақсадига ета олмаслигини англаб етгани ва шу сабаб можародан чиқишга уринаётганини таъкидламоқда. Шу билан бирга, Эрон раҳбарияти сулҳ ҳатто узайтирилган тақдирда ҳам хавф-хатарлар сақланиб қолишини билдирган.
Хусусан, Эрон томони АҚШ ва Исроил томонидан эҳтимолий террористик ҳаракатлар амалга оширилиши мумкинлигини истисно этмаяпти. Бу эса Теҳрон томонидан жиддий хавф сифатида баҳоланмоқда.
Бундан ташқари, Ҳормуз бўғозидаги вазият ҳам алоҳида эътибор марказида. АҚШ томонидан денгиз блокадасининг давом этиши можарони янада чўзиши мумкинлиги таъкидланмоқда. Эрон эса ушбу стратегик сув йўлини ёпиқ ҳолда қолдирмаслигини ва зарурат туғилса, уни куч ишлатиш орқали очишга тайёр эканини билдирган.
Маълум бўлишича, 21 апрель куни Эрон АҚШ билан музокараларнинг янги босқичи учун Покистонга боришдан ҳам бош тортган. Бунга сабаб сифатида Вашингтон томонидан сулҳ шартларининг бузилгани ва ортиқча талаблар қўйилгани кўрсатилган.
Шунга қарамай, Доналд Трамп сулҳни муддатсиз равишда узайтириш ҳақида баёнот берган. Унинг таъкидлашича, бу қарор Покистон расмийларининг илтимоси билан қабул қилинган.
Эрон парламенти спикерининг маслаҳатчиси Маҳдий Муҳаммад эса сулҳни чўзишдан маъно йўқлигини билдирди. Унинг фикрича, “ютқазган томон шарт қўя олмайди”, денгиз блокадасини давом эттириш эса амалда бомбардимонга тенг бўлиб, бундай ҳаракатларга ҳарбий жавоб қайтарилиши лозим.
Шу тариқа, томонлар ўртасидаги қарама-қаршилик янада чуқурлашиб, вазият янги кескин босқичга ўтиш арафасида тургани кузатилмоқда.
“Zamin”ни Telegram'да ўқинг!
