Эрон давлат телевидениеси хабарига кўра, Теҳрон сулҳ битимининг узайтирилишини тан олмаслигини маълум қилган. Расмий баёнотда қайд этилишича, мамлакат ўзининг миллий манфаатларидан келиб чиқиб, сулҳ шартларига риоя қилиши ёки уни бажаришни тўхтатиши мумкин.
“Тасним” ахборот агентлиги тарқатган маълумотга кўра, Эрон Покистон орқали АҚШга Исломободда ўтказилиши мумкин бўлган музокараларда иштирок этмаслигини расман билдирган. Шунингдек, Теҳрон томонидан АҚШдан сулҳ муддатини узайтириш бўйича ҳеч қандай сўров ҳам йўлланмагани таъкидланган.
Баёнотларда денгиз йўлларидаги чекловлар масаласига ҳам тўхталиб ўтилган. Эрон томони денгиз блокадасининг давом этиши душманона ҳаракат сифатида баҳоланишини билдирган. Агар вазият ўзгармаса, мамлакат Форс кўрфазидаги стратегик аҳамиятга эга Ҳормуз бўғози орқали транспорт ҳаракатини тикламаслиги мумкинлиги айтилган.
Шунингдек, расмийлар зарурат туғилганда блокадани куч ишлатиш йўли билан бекор қилиш эҳтимоли ҳам истисно қилинмаслигини қайд этган. Бу эса минтақадаги кескинлик янада кучайиши мумкинлиги ҳақидаги хавотирларни оширмоқда.
“Zamin”ни Telegram'да ўқинг!
