Трамп Ҳормуз бўғозини миналаштираётган кемаларни чўктиришни буюрди
Доналд Трамп АҚШ Ҳарбий-денгиз кучларига Ҳормуз бўғозида мина ўрнатишга уринган ҳар қандай кемани дарҳол йўқ қилиш ҳақида қатъий буйруқ берди. Шунингдек, ҳудудда миналарни зарарсизлантириш ишларини уч баравар ошириш ва ҳар қандай таҳдидга қарши иккиланишсиз чора кўриш вазифаси юклатилди. Трамп ушбу ҳаракатларни хавфсизликни таъминлаш билан изоҳлаган бўлса-да, экспертлар бундай кескин қарорлар минтақадаги тарангликни янада кучайтириши мумкинлигидан хавотирда.
Доналд Трамп ўзининг ижтимоий тармоқдаги баёноти орқали Ҳормуз бўғози атрофидаги вазият бўйича кескин ва қатъий кўрсатма берди. Унинг сўзларига кўра, АҚШ Ҳарбий-денгиз кучларига ушбу ҳудудда миналар ўрнатишга уринган ҳар қандай қайиқни — ҳатто кичик бўлса ҳам — дарҳол йўқ қилиш буюрилган.
Трампнинг таъкидлашича, бу борада “ҳеч қандай иккиланиш бўлмаслиги керак”. У АҚШ кемалари ҳар қандай таҳдидга қарши қатъий ҳаракат қилишини алоҳида урғулаган.
Шунингдек, у Ҳормуз бўғозида миналарни зарарсизлантириш билан шуғулланаётган махсус кемалар фаолияти аллақачон бошланганини маълум қилган. Унинг айтишича, бу ишлар ҳозирда давом этмоқда ва уларни янада кенгайтириш, яъни уч баравар ошириш бўйича ҳам топшириқ берилган.
Мутахассислар бундай кескин буйруқлар минтақадаги тарангликни янада ошириши мумкинлигини айтмоқда, чунки Ҳормуз бўғози жаҳон энергетика йўлларининг энг муҳим нуқталаридан бири ҳисобланади.
Изоҳлар 0
…