АҚШда инсонни ҳайратга соладиган воқеа содир бўлди. АҚШнинг Калифорния штатида жойлашган Ранчо-Кукамонга шаҳрида 49 ёшли аёл катта баландликдан қулаганига қарамасдан тирик қолди.
Маълум қилинишича, мазкур аёл руҳий касалликдан азият чеккан ва олдиндан жароҳатлари ҳам бўлган. У уйидан чиқиб кетиб, узоқ вақт қайтмаганидан сўнг оила аъзолари хавотирга тушиб, полицияга мурожаат қилган. Шундан сўнг қидирув-қутқарув ишлари зудлик билан бошлаб юборилди.
Қидирув жараёнига махсус тайёрланган изқувар итлар ва қутқарув гуруҳлари жалб этилди. Мураккаб ва нотекис ҳудудда қарийб ярим километр масофани босиб ўтган қутқарувчилар жарлик томон ҳаракатланаётган пайтда аёлнинг ёрдам сўраб чақирган овозини эшитишган. Ана шу ҳолат уни топишда ҳал қилувчи омил бўлган.
Аниқланишича, аёл қарийб 60 метр баландликдаги тик жарликдан қулаган. Бу каби ҳолатларда тирик қолиш эҳтимоли жуда паст ҳисобланади. Шунга қарамасдан, у оғир жароҳатлар олган бўлса-да, ҳаётдан узилмаган.
Қутқарув хизмати ходимлари уни зудлик билан вертолёт орқали хавфли ҳудуддан олиб чиқиб, шифохонага етказишди. Ҳозирда аёл шифокорлар назорати остида бўлиб, унинг аҳволи барқарор деб баҳоланмоқда.
Бу воқеа яна бир бор инсон организми имкониятлари баъзан тасаввурдан ҳам юқори бўлишини кўрсатди. Ҳар қандай оғир вазиятда ҳам умидни йўқотмаслик керак — баъзан мўъжиза ҳам рўй беради.
“Zamin”ни Telegram'да ўқинг!
