Сурияда янги ҳокимият ҳарбий инфратузилмани қайта шакллантиришга жиддий киришди. Аҳмад аш-Шараа бошчилигидаги маъмурият Хмеймим авиабазасини Россиядан қайтариб олиб, уни миллий армия учун ўқув марказига айлантиришни режалаштираётгани маълум қилинди.
Коммерсант нашрининг Дамашқдаги манбасига кўра, базани тўлиқ ҳарбий объект сифатида эмас, балки “ҳамкорликда бошқариладиган” ва асосан ҳарбий бўлмаган вазифаларни бажарадиган форматда ишлатиш имконияти ҳам кўриб чиқилмоқда.
Манба таъкидлашича, ҳозирги Сурия армияси таркибининг катта қисми собиқ исёнчилардан иборат бўлиб, улар тўлиқ ҳарбий тайёргарликдан ўтмаган. Шу сабабли Лазиқия вилоятида жойлашган ушбу база ҳарбийлар тайёргарлиги учун қулай майдон сифатида баҳоланмоқда.
Шу билан бирга, Ал-Модон манбаларига кўра, Дамашқ россиялик ҳарбий инструкторларни жалб қилишни ҳам режалаштирмоқда. Бу қарор армияда ҳали ҳам совет ва Россия ишлаб чиқарган техника устунлиги билан изоҳланмоқда. Бироқ гап асосан қуруқликдаги кучлар тайёргарлиги ҳақида кетмоқда — авиация бўйича тайёргарлик режада йўқ.
Маълумотларга кўра, Башар Асад режими қулаганидан сўнг Россия ушбу базалардан кўплаб стратегик қуролларини, жумладан С-300 ва С-400 ҳаво мудофаа тизимлари ҳамда “Бастион” ракеталарини олиб чиқиб кетган. Россия халқаро ишлар кенгаши эксперти Антон Мардасов фикрича, бу ҳолат базанинг ҳарбий аҳамиятини анча пасайтирган.
Ҳозирча Россияга Хмеймим авиабазасидан Африка йўналишида логистика мақсадида фойдаланишга рухсат берилмоқда. Бироқ сиёсий вазиятга қараб бу келишув ўзгариши мумкин.
Эслатиб ўтиш жоиз, жорий йил январь ойида Дамашқ Россиядан Қамишли базасидан ҳам қўшинларини олиб чиқишни талаб қилган эди.
Қисқача айтганда, Сурияда ҳарбий баланс ва ташқи таъсирлар қайта тақсимланмоқда. Хмеймим атрофидаги қарорлар нафақат мамлакат, балки бутун минтақанинг геосиёсий келажагига таъсир қилиши мумкин.
“Zamin”ни Telegram'да ўқинг!
