Москвада қор ёғмоқда: кучли шамол ҳаётни издан чиқарди (видео)
27 апрель куни Москвада кутилмаган об-ҳаво ўзгариши кузатилиб, баҳорда қор ёғди ва кучли шамол ҳаётни издан чиқарди. Шаҳарда «сариқ даражадаги хавф» эълон қилинди, бу эса инфратузилмага салбий таъсир кўрсатди, дарахтлар ағдарилиб, транспорт ҳаракати тўхтади. Внуково аэропортида 50 дан ортиқ самолёт парвозини амалга ошира олмади, электр таъминотида ҳам муаммолар кузатилди. Апрель Москвада “қиш кайфияти”ни қайтадан ҳис қилдирди.
27 апрель куни Москва шаҳри ва Москва вилоятида кутилмаган об-ҳаво ўзгариши кузатилиб, баҳор ўртасида қор ёғиши аҳолини ҳайратга солди. Қор, яхмалак ва кучли шамол сабаб шаҳарда «сариқ даражадаги хавф» эълон қилинди.
Гидрометеорология маркази маълумотига кўра, ёғингарчилик ва сониясига 18–23 метргача етаётган шамол кун давомида сақланиб турди. «Фобос» маркази мутахассиси Евгений Тишковец эса бу ҳолатда Москвада ойлик ёғингарчилик меъёрининг ярми тушганини таъкидлади.
Қаттиқ шамол ва қор шаҳар инфратузилмасига ҳам таъсир қилди. Айрим ҳудудларда дарахтлар ағдарилиб, транспорт ҳаракатига халақит берди. Хусусан, метронинг Арбат-Покровск йўналишида дарахт темирйўлга қулаши оқибатида «Партизанская» ва «Шчелковская» бекатлари орасида поездлар қатнови вақтинча тўхтатилди.
Авиация соҳасида ҳам жиддий муаммолар кузатилди. Тун давомида 50 дан ортиқ самолёт Внуково аэропортидан вақтида парвоз қила олмади. Кейинчалик расмийлар ноқулай об-ҳаво туфайли айрим рейслар кечиктирилганини тасдиқлади.
Москва вилоятининг Дубна ва Домодедово шаҳарларида эса дарахтлар қулаши натижасида электр таъминоти қисман узилди. Шунингдек, Павелецкий ва Савеловский йўналишларида поездлар ҳаракати ҳам чекланди.
Қисқача айтганда, апрель Москвага “қиш кайфияти”ни қайтарди. Табиат яна бир бор эслатди: режаларинг бўлиши мумкин, лекин охирги қарор ҳар доим об-ҳавоники.
Изоҳлар 0
…