Эрон парламенти раҳбари Муҳаммад Боқир Қолибоф АҚШ билан кечаётган иқтисодий рақобат ва босимлар масаласида кескин баёнот билан чиқди. Унинг фикрича, АҚШ Эронга қарши санкциялар ва иқтисодий чекловлар борасида асосий “карталари”нинг катта қисмини аллақачон ишлатиб бўлган.
Қолибоф ўз муносабатини ижтимоий тармоқ орқали билдириб, АҚШ томонидан намоён этилаётган устунликка шубҳа билан қараш кераклигини таъкидлади. Унинг айтишича, вазиятга чуқур назар ташланса, таъминот ва талаб имкониятлари ўзаро мувозанатда экани кўриниб турибди. Бу эса иқтисодий курашда бир томонлама устунлик йўқлигини англатади.
«Улар ўз устунлиги билан мақтанишяпти. Келинг, қараб чиқайлик: бу ерда таъминот имкониятлари талаб имкониятларига тенг», – деб ёзди Қолибоф X тармоғида.
Сиёсатчи Эроннинг ҳали тўлиқ ишга солинмаган муҳим стратегик имкониятларига ҳам тўхталиб ўтди. У жумладан Ҳўрмуз бўғози, Баб-ул-Мандаб бўғози каби муҳим геосиёсий нуқталарни, шунингдек нефть қувурлари орқали таъсир ўтказиш имкониятларини алоҳида қайд этди. Бу омиллар жаҳон энергетика бозорида жиддий таъсир кучига эга экани сир эмас.
Шу билан бирга, АҚШ томони ҳам қатор иқтисодий чораларни амалга оширган. Жумладан, стратегик нефть захираларини бозорга чиқариш, талабни сунъий равишда қисқартириш ва нарх сиёсатини мослаштириш каби механизмлар орқали вазиятни назорат қилишга ҳаракат қилинган.
Қолибофнинг таъкидлашича, Эрон ҳали барча имкониятларини ишга солмаган ва бу келгусидаги иқтисодий қарама-қаршиликларда муҳим рол ўйнаши мумкин. Унинг фикрича, АҚШ эса аксинча, ўз ресурсларининг маълум қисмини аллақачон сарфлаб бўлган.
Шунингдек, у яқин ойларда энергия ресурсларига бўлган талаб ошишини ҳам инобатга олиш зарурлигини урғулади. Айниқса, ёз мавсумида истеъмол ҳажми ортиши АҚШ учун қўшимча босим омилларидан бирига айланиши мумкин.
Қисқаси, бу баёнотлар глобал энергетика ва иқтисодий рақобат янги босқичга ўтаётганидан далолат беради. Энди эътибор — қайси томон ўз имкониятларини самаралироқ ишга сола олади, шу ерда.
“Zamin”ни Telegram'да ўқинг!
