Америка Қўшма Штатлари визалар бериш тизимида навбатдаги қатъий ўзгаришларни жорий этмоқда. Янги қоидаларга кўра, ўз ватанида таъқиб ёки зўравонликдан қўрқаётганини билдирган шахсларга ноиммиграцион визалар тақдим этилмайди. Бу ҳақда The Washington Post нашри АҚШ Давлат департаментининг ички ҳужжатига таяниб хабар берди.
Янги тартибга мувофиқ, АҚШ консулликларида туризм, таълим ёки меҳнат фаолияти учун визага мурожаат қилувчилардан қўшимча саволлар сўралади. Хусусан, ариза берувчи ўз мамлакатида зўравонликка дуч келган-келмагани ва қайтиб боришдан қўрқиши ҳақида аниқ жавоб бериши талаб этилади. Агар ушбу саволлардан бирортасига ижобий жавоб берилса, унинг ноиммиграцион виза олиш имконияти бекор қилинади.
Нашр маълумотларига кўра, мазкур чоралар орқали АҚШ ҳукумати оддий виза билан мамлакатга кириб, кейинчалик бошпана сўраб мурожаат қиладиганлар сонини камайтиришни мақсад қилган. Давлат департаменти бу борада консулликларни “миллий хавфсизликнинг биринчи ҳимоя чизиғи” сифатида баҳолаб, иммиграция тизимидан ноқонуний фойдаланиш ҳолатларига чек қўйиш зарурлигини таъкидламоқда.
Бу ўзгаришлар аввалги қадамларнинг давоми сифатида кўрилмоқда. Хусусан, Трамп маъмурияти даврида талаба визалари учун текширув жараёнлари аллақачон кучайтирилган эди. Шунингдек, жорий йил январ ойида АҚШ 75 давлат фуқаролари учун иммиграцион визалар беришни вақтинча тўхтатгани ҳам катта муҳокамаларга сабаб бўлганди.
Мутахассислар фикрича, янги чекловлар виза олиш жараёнини янада мураккаблаштиради ва ариза берувчилардан максимал даражада аниқлик ва очиқлик талаб қилади. Шу билан бирга, бу қарор АҚШнинг иммиграция сиёсатида хавфсизлик ва назоратни биринчи ўринга қўяётганини яна бир бор намоён этмоқда.
Энди савол шунда: бу чекловлар халқаро талабалар ва саёҳатчилар оқимига қандай таъсир қилади? Буни яқин ойлардаги статистика аниқ кўрсатиб беради.
