Фото: Yandex
АҚШ президенти Доналд Трамп Ҳормуз бўғозида амалга оширилаётган “Project Freedom” (“Озодлик лойиҳаси”) операцияси вақтинча тўхтатилганини маълум қилди. Бу ҳақда у Truth Social орқали баёнот берди.
Президентнинг таъкидлашича, мазкур қарор Эрон билан эҳтимолий келишувга эришиш имкониятларини кўриб чиқиш мақсадида қабул қилинган. Унинг сўзларига кўра, бу қадам бир қатор давлатлар, жумладан Покистоннинг мурожаатлари асосида амалга оширилган.
Трамп АҚШ томони ҳарбий жиҳатдан “катта ютуқларга эришгани”ни билдириб, томонлар ўртасида якуний келишувга яқинлашиш борасида сезиларли силжиш кузатилаётганини айтди.
Аввалроқ Марко Рубио “Epic Rage” (“Эпик ғазаб”) операцияси якунлангани ва барча мақсадларга эришилганини маълум қилган эди. Унинг таъкидлашича, Вашингтон Эрон билан кенг қамровли келишувга эришишни мақсад қилган.
Маълумки, бир неча кун аввал Трамп АҚШ кемалари Ҳормуз бўғозида қолиб кетган фуқаро кемаларига ёрдам кўрсатишини айтган ва бу амалиётни гуманитар қадам сифатида баҳолаганди. У кемаларда озиқ-овқат ва зарур воситалар етишмаётганини таъкидлаган.
Бироқ Эрон томони бу ташаббусга кескин муносабат билдирди. Мамлакат ҳарбийлари АҚШ кемалари бўғозга яқинлашган тақдирда уларга зарба беришга тайёр эканини маълум қилди.
Шунингдек, Трамп "Fox News"га берган интервьюсида агар Эрон АҚШ кемаларига ҳужум қилса, жуда қаттиқ жавоб қайтарилишини билдирган. АҚШ мудофаа вазири Пит Ҳегсет ҳам бу ҳолатда кучли ҳарбий жавоб бўлишини таъкидлади.
Мутахассислар фикрича, операциянинг тўхтатилиши дипломатик музокаралар учун янги имконият яратиши мумкин, бироқ минтақадаги кескинлик ҳали ҳам юқори даражада сақланиб қолмоқда.
“Zamin”ни Telegram'да ўқинг!
