Франциянинг собиқ президенти Николя Саркози билан боғлиқ шов-шувли иш яна жамоатчилик диққат марказига чиқди. RTL радиостанцияси суд органларидаги манбаларига таяниб хабар беришича, собиқ давлат раҳбари шартли равишда муддатидан олдин озод қилинган.
Маълум қилинишича, жазони ўташ тартибини енгиллаштириш бўйича мурожаатни Николя Саркозининг ўзи берган. Суд ушбу илтимосни 5 май куни қаноатлантирган.
Қарор қабул қилинишида унинг ёши асосий омиллардан бири бўлгани айтилмоқда. Ҳозирда собиқ президент 71 ёшда. Суд қарори 7 майдан расман кучга киради.
Гап Францияда кенг муҳокамаларга сабаб бўлган машҳур “Bygmalion” иши ҳақида кетмоқда. Бу иш 2012 йилги президентлик сайлови даврида Николя Саркозининг сайлов кампанияси харажатлари билан боғлиқ бўлган.
Ўша пайтда унинг сайлов кампаниясига хизмат кўрсатган PR агентлиги “Bygmalion” орқали харажатлар сунъий равишда яширилгани ва молиявий қоидалар бузилгани ҳақида айбловлар илгари сурилган эди.
2021 йил кузида Франция суди Николя Саркозини ноқонуний молиялаштириш схемасида айбдор деб топган.
Дастлаб собиқ президент бир йиллик қамоқ жазосига ҳукм қилинган эди. Кейинчалик жазо юмшатилиб, унга электрон браслет таққан ҳолда озодликда юришга рухсат берилган.
RTL маълумотига кўра, янги қарордан кейин у электрон назорат браслетини ҳам тақмайдиган бўлди.
Маълумот учун, Николя Саркози 2007 йилдан 2012 йилгача Франция президенти лавозимида фаолият юритган. У мамлакат тарихида ҳақиқий қамоқ жазосини олган биринчи собиқ давлат раҳбари сифатида тарихга кирган.
Сиёсий таҳлилчилар фикрича, бу иш Франция сиёсий ҳаётидаги энг шов-шувли жараёнлардан бири бўлиб қолмоқда. Чунки у нафақат собиқ президент тақдири, балки мамлакатдаги сиёсий масъулият ва қонун устуворлиги мавзуларини ҳам яна кун тартибига олиб чиққан.
“Zamin”ни Telegram'да ўқинг!
