Марказий Осиёда уруш фахрийларига қанча пул берилди?
Марказий Осиё мамлакатлари Иккинчи жаҳон уруши қатнашчиларига байрамлар муносабати билан турлича миқдорда бир марталик пул мукофотлари ажратди. Жумладан, Ўзбекистонда 60 нафар уруш фахрийсининг ҳар бирига 30 миллион сўм берилди. Қозоғистондаги 83 нафар фахрийга 5 миллион тенгедан ортиқ маблағ ажратилди, Қирғизистонда 24 нафар фахрийнинг ҳар бирига 200 минг сом тўланди.
Иккинчи жаҳон уруши миллионлаб инсонлар тақдирига таъсир қилган оғир синов бўлди. Марказий Осиё давлатлари ҳам бу қирғинда катта йўқотишларга учради. Бугунги кунда эса уруш қатнашчилари сони йилдан-йилга камайиб бормоқда ва уларга кўрсатилаётган эътибор алоҳида аҳамият касб этмоқда. Бу ҳақда Дзен хабар берди.
2026 йил ҳолатига кўра, Ўзбекистонда 60 нафар уруш фахрийси ҳаёт кечирмоқда. 9 май — Хотира ва қадрлаш куни муносабати билан уларнинг ҳар бирига 30 миллион сўм миқдорида бир марталик мукофот ажратилди. Илгариги йилларда бу сумма янада юқори бўлгани, хусусан, айрим ҳолатларда 10 минг долларгача етгани қайд этилади.
Қозоғистонда ҳозирда 83 нафар Иккинчи жаҳон уруши гувоҳи қолган. Уларга ғалабанинг 81 йиллиги муносабати билан 5 миллион тенгеден (10 минг доллардан ортиқ) пул берилди. Шунингдек, давлат томонидан ойлик нафақалар ва тиббий хизматлар орқали ҳам қўшимча қўллаб-қувватлаш таъминланмоқда.
Қирғизистонда эса 24 нафар уруш фахрийси сақланиб қолган. Давлат раҳбари қарорига кўра, уларнинг ҳар бирига 200 минг сом (тақрибан 27 миллион сўмдан зиёд) бир марталик тўлов амалга оширилди.
Тожикистонда уруш қатнашчилари сони жуда кам — атиги 8 нафар. Уларга 50 минг сомоний (тахминан 64 миллион сўм) миқдорида пул мукофоти берилган. Шу билан бирга, фронт ортида меҳнат қилганларга ҳам алоҳида моддий ёрдам ажратилган.
Туркманистонда эса аниқ рақамлар очиқланмаган. Айрим маълумотларга кўра, аввалги йилларда фахрийларга кам миқдорда пул берилган, аммо асосий эътибор совғалар ва байрам тадбирларига қаратилган.
Умуман олганда, Марказий Осиё давлатлари уруш фахрийларини қўллаб-қувватлашга ҳаракат қилмоқда. Бироқ рақамлардан кўриниб турибдики, нафақат фахрийлар сони, балки уларга ажратилаётган маблағлар ҳам мамлакатларга қараб сезиларли даражада фарқ қилади.
Изоҳлар 0
…