Италия дипломатияси оламида катта шов-шувга сабаб бўлган воқеа юз берди. Италиянинг мамлакатимиздаги собиқ фавқулодда ва мухтор элчиси Пергабриеле Пападиа де Боттини ди Сант-Анезе ноқонуний виза бериш тизимини ташкил қилганликда гумонланиб қўлга олинди.
Тошкент орқали "яширин йўлак"
Тергов хулосаларига кўра, дипломат ўз ҳамтовоғи — Италия ва Россия фуқаролигига эга бўлган Татяна Тараканова билан тил бириктириб, Тошкентдаги элчихонани Россия фуқаролари учун Шенген ҳудудига кириш "дарвозаси"га айлантирган. Улар Россия фуқароларига узоқ муддатли сайёҳлик визаларини ноқонуний йўл билан расмийлаштириб бериш билан шуғулланиб келишган.
Даҳшатли нархлар ва схеманинг миқёси
Коррупцион занжирнинг тафсилотлари кишини ҳайратга солади:
Нарх наво: Аслида давлат божи бор-йўғи 45-60 евро бўлган визалар учун мижозлардан 4 000 дан 16 000 еврогача маблағ ундирилган.
Қалбакилаштириш: Аниқланган 95 та ноқонуний виза соҳибларининг аксарияти Ўзбекистонда истиқомат қилмаган ва ҳатто элчихонага шахсан келишмаган.
Иштирокчилар: Ушбу ноқонуний канални юритишда Москвадаги учта йирик сайёҳлик агентлиги воситачилик қилган.
Текширувлар давом этмоқда
Ушбу қонунбузарликлар Италия Ташқи ишлар вазирлиги томонидан 2025 йилда фош этилди. Ҳозирда тергов гуруҳи яна 400 га яқин шубҳали ҳолатни ўрганмоқда. Шунингдек, айбланувчиларнинг 3 миллион евро қийматидаги активлари хатлаб қўйилган ва текширилмоқда.
Бу воқеа дипломатик мақомдан шахсий манфаат йўлида фойдаланиш нақадар оғир оқибатларга олиб келишини яна бир бор кўрсатди.
Сизнингча, дипломатик идораларда бундай ҳолатларнинг олдини олиш учун назоратни янада кучайтириш керакми?
“Zamin”ни Telegram'да ўқинг!
