Россия президенти Владимир Путин яқин кунларда Хитойга расмий ташриф билан йўл олади. Кремл берган маълумотга кўра, ушбу ташриф 19–20 май кунларига белгиланган бўлиб, у икки давлат ўртасидаги стратегик алоқаларни янада мустаҳкамлашга қаратилган.
Маълум қилинишича, ушбу сафар рамзий аҳамиятга ҳам эга. Сабаби, у Россия ва Хитой ўртасида имзоланган яхши қўшничилик, дўстлик ва ҳамкорлик тўғрисидаги муҳим шартноманинг 25 йиллигига бағишланади. Бу ҳужжат йиллар давомида икки давлат муносабатларининг асосий таянчи бўлиб хизмат қилиб келмоқда.
Ташриф давомида Си Цзиньпин ва Владимир Путин ўртасида кенг қамровли музокаралар ўтказилиши режалаштирилган. Унда икки томонлама алоқаларни ривожлантириш, сиёсий ҳамкорликни чуқурлаштириш ҳамда “ҳар томонлама стратегик шериклик”ни янги босқичга олиб чиқиш масалалари муҳокама қилинади. Шунингдек, етакчилар глобал ва минтақавий кун тартибидаги долзарб масалалар юзасидан ҳам фикр алмашади.
Музокаралар якунида қўшма баёнот қабул қилиниши, шунингдек, бир қатор муҳим икки томонлама ҳужжатлар имзоланиши кутилмоқда. Бу эса Россия–Хитой муносабатларида янги босқич бошланишидан дарак бериши мумкин.
Сафар доирасида Путин Хитой Давлат кенгаши раҳбари — бош вазир Ли Сян билан ҳам учрашади. Мазкур учрашувда савдо-иқтисодий ҳамкорликни кенгайтириш, инвестиция лойиҳалари ва ўзаро иқтисодий алоқаларни ривожлантириш истиқболлари муҳокама қилинади.
Эслатиб ўтамиз, Владимир Путиннинг Хитойга сўнгги ташрифи 2025 йилнинг август ойи охирларига тўғри келган эди. Ўшанда ҳам томонлар стратегик ҳамкорликни мустаҳкамлашга алоҳида урғу берган.
Мутахассисларнинг фикрича, бу галги ташриф айниқса муҳим бўлиши мумкин. Чунки ҳозирги глобал сиёсий вазиятда Россия ва Хитой ўртасидаги яқинлашув нафақат икки давлат, балки бутун минтақа ва халқаро майдондаги кучлар мувозанатига сезиларли таъсир кўрсатиши эҳтимолдан холи эмас.
“Zamin”ни Telegram'да ўқинг!
