Ғазо шаҳрининг Шайх Развон маҳалласида ўзгача ва эсда қоларли тўй маросими бўлиб ўтди. Унда куёв келинни анъанавий автомобиллар карвони ўрнига юклагичда олиб келгани билан барчанинг эътиборини тортди.
Одатда Ғазода келин-куёв тўй маросимига безатилган машиналар кортежида етиб келади. Аммо бу сафар куёв ўз касбига содиқ қолиб, ноодатий йўлни танлади. Маълум бўлишича, у юклагич ҳайдовчиси бўлиб ишлайди ва айнан шу техника ёрдамида келинни тўйга олиб келишни маъқул кўрган.
Видеони тасвирга олган Карам Абу Ҳассаниённинг айтишича, ушбу ғоя куёвнинг ўзига хос қарори бўлган ва маросимга алоҳида кайфият бағишлаган. Тасвирларда келин ва куёв юклагич устида табассум билан ўтиргани, атрофдагилар эса уларни қувонч билан кузатаётгани акс этган.
Мазкур видео ижтимоий тармоқларда тез тарқалиб, фойдаланувчилар орасида илиқ муносабат уйғотди. Кўпчилик буни оддийлик, самимийлик ва касбга ҳурмат рамзи сифатида баҳоламоқда.
Бу ҳолат яна бир бор шуни кўрсатадики, бахт ва қувончни намоён этиш учун қимматбаҳо анъаналар эмас, балки самимийлик ва ижодкорлик муҳим.
“Zamin”ни Telegram'да ўқинг!
