Белгияда канализация қазиш пайтида кутилмаган хазина топилди

Бельгияда янги канализация тизимини қуриш учун олиб борилаётган қазиш ишлари вақтида ишчилар кутилмаган ва ниҳоятда қимматли хазинага дуч келди. Улар бино подвали деворлари орасидан қиймати тахминан 9 миллион евро деб баҳоланаётган олтин қуймалари ва тангаларини топишди.

Ғайриоддий воқеа мамлакат шарқидаги Фламандия ҳудудида жойлашган Дендермонде шаҳрида содир бўлган. Қурилиш ишлари маҳаллий ижтимоий ёрдам ташкилоти — CAW East Flandersга тегишли бинода олиб борилаётган эди. Ишчилар янги канализация тизими учун қувурлар ўрнатиш мақсадида ер ва деворларни қазиш ишларини бажараётган пайтда олтинга дуч келишган. Улар бундай қимматбаҳо нарса топишни умуман кутмаган ва дастлаб кўзларига ишона олмаган.

Топилма аниқланиши билан ишчилар дарҳол полицияга хабар берган. Кейинчалик ҳуқуқ-тартибот идоралари воқеа жойида олинган суратларни ҳам эълон қилди. Уларда 50 га яқин олтин қуймаси ва катта миқдордаги олтин тангалари кўринади.

Полиция маълум қилишича, топилган бойликлар рўйхатга олинган ва давлат федерал идоралари тасарруфидаги юқори даражада қўриқланадиган махсус омборга олиб кетилган.

Айни пайтда энг қизиқ савол — ушбу улкан хазинанинг қонуний эгаси ким экани. Ҳозирча олтин кимга тегишли бўлгани, шунингдек, уни ишчилар ёки бошқа шахслар олиб қолиши мумкинми-йўқми, аниқ эмас. Олтин топилгани ҳақидаги хабар тез орада кенг тарқалгач, қизиқувчилар ва хазина изловчилар қурилиш майдонига кела бошлаган. Шу сабабли полиция ҳудудга киришдан сақланиш ҳақида огоҳлантирди.

Ҳуқуқ-тартибот идоралари ижтимоий тармоқлардаги ҳазиломуз хабарларидан бирида айрим хазина изловчилар воқеа жойига қайтишга қизиқиш билдирганини ҳам қайд этди. Бироқ полициянинг таъкидлашича, ҳудудга боришдан «ҳеч қандай маъно йўқ».

Шундай қилиб, оддий канализация қурилиши учун бошланган қазиш ишлари кутилмаганда миллионлаб евро турадиган сирли хазинанинг топилиши билан якунланди. Энди эса мутасаддилар олтиннинг келиб чиқиши ва ҳақиқий эгасини аниқлаши керак. Полиция ушбу кутилмаган бойлик охир-оқибат «тўғри қўлларга» топширилишига умид билдирган.