Эронлик аёл стадионга кириш учун эркак қиёфасига кирди (фото)

Эронлик Заҳро Ҳушнавоз футбол ўйинига тушиш учун кўринишини жиддий ўзгартириб, эркак киши қиёфасига кирди, деб ёзади Кун нашри.

Уни аёл бўлгани учун севимли футбол жамоаси бўлмиш «Персеполис»нинг ўйинларига киритишмайди. Шу сабаб у эркак қиёфасига киришга мажбур бўлади. Заҳро севимли жамоасига мухлислик қилиш учун сочини кестириб, ясама соқол қўйдиради.

«Ўтган йили Теҳронда содир бўлган кучли зилзиладан сўнг ўзимдан сўрадим: «Нега энди орзуларимни рўёбга чиқармасдан ўлиб кетишим керак? Нега биз аёллар стадионга бора олмаймиз?», дейди у.

Эрон президенти Ҳасан Руҳонийнинг гендер тенглигини амалга ошириш борасидаги ваъдаларига қарамасдан мамлакатда хотин-қизлар ҳуқуқлари поймол этилмоқда. Таомилга кўра, Эронда аёллар фақатгина аёллар футболига ишқибозлик қилишлари мумкин. Ҳушнавоз гримда иккита ўйинни трибунадан туриб кузатди ва бу унга бир қанча муаммоларни келтиришига қарамасдан у шу тариқа давом этмоқчи.

«Персеполис» футбол клуби бош мураббийи унинг ҳаракати хавфли экани ва у буни такрорламаслиги кераклигини айтади.

Заҳро аввалига стадионга киришга қийналган. Футбол клуби у ҳақида билиши учун ижтимоий тармоқларга суратини жойлаштирган. Энди эса ҳар гал ўйин пайти «Персеполис» Заҳро келишини кутади.


Қайд этиш керакки, бир неча йиллардан буён Эронда тенгсизликка қарши кураш кетмоқда. Ҳушнавознинг айтишича, мамлакатдаги аёллар стадионлар барча учун очиқ бўлишини истайди. У шунингдек, аҳолининг хоҳиш-истагини рад этиш келажакда катта муаммоларга сабаб бўлиши мумкинлигидан огоҳлантиради. “Замин” янгиликларини “Telegram”да кузатиб боринг