Швецияда бир гуруҳ ўзбеклар террор ҳаракатига ҳозирлик кўрганликда айбланмоқда

Расмий хабарларда таъкидланишича, Швеция махсус хизмати ходимлари уларни 2017 йилдан бери кузатув остида ушлашган. Ҳар бир телефон сўзлашувлари тинглаб келинган. Ниҳоят террорчилар ўзларининг махфий сўзлашув кодини ошкор қилиб қўйишди. Шведлар тушуниб етишдики, радикаллар бир-бирига «Тўй» деган сўзни айтганда, террорни назарда тутаркан. «Машинани безатиш» жумласи олдиндан танланган автомобилга бомба ўрнатишни англатаркан.

Ушбу террор гуруҳи етакчиси Давид Идриссон исмли шахс экан. Аслида у ўзбекистонлик Фарҳод Тошмуҳамедов (СУРАТДАГИ КИМСА) ҳисобланади. У Швецияга 2008 йили кўчиб борган. Бу мамлакатдан қочоқ статусини олгач, исм-фамилиясини Давид Идриссон этиб ўзгартирди. Айнан у қўлбола бомба тайёрлаш учун химикатлар партиясини сотиб олган.

Гуруҳнинг бошқа бир аъзоси Бахтиёр Умаров Грециянинг қалбаки паспортига эгалик қилган ҳолда Туркиядаги жангари каллакесарларга банк орқали пул ўтказиб турган. Бахтиёр қўқонлик Абдулқодир Машарипов билан жуда иноқ экан. Эслатиб ўтамиз, Абдулқодир Истамбулдаги «Reina» тунги клубига ташриф буюрган мижозларни 200 минг доллар эвазига ўққа тутган. Ўшанда 40 киши ҳалок бўлган, 70 киши турли даражада жароҳатлар олганди.

Қирғизистонлик Отабек Абдуллаев ҳам гуруҳ аъзоси. У террор ҳаракати содир этилиши лозим бўлган жойни ҳамтовоқларига танлаб бериб турган.

Хайриятки, жангари каллакесарлар ўзларининг ёвуз ниятига ета олмади. Швеция махсус хизмати ходимлари барчаларини қўлга олишди. Ҳозир ўзбекистонлик ва қирғизистонлик беш жангари қамоққа олинган. Олтинчи жангари судга қадар шаҳардан чиқмаслик шарти билан вақтинча озодликда қолдирилган.

Суд эса 2019 йил 7 январ куни бўлиб ўтади. Маҳаллий прокуратура вакилларининг айтишига қараганда, барча террорчилар камида бир умрлик қамоқ жазосига ҳукм этилади.

Манба: Hordiq.uz

Янгиликлар