АҚШнинг собиқ контрразведка ходими Эрон фойдасига жосуслик қилганликда айбланди

^{Фото: Украинформ}
АҚШ контрразведкаси собиқ ходими Моника Уитт АҚШнинг миллий мудофааси ҳақидаги маълумотларни Эрон ҳукумати вакилларига етказишда айбланмоқда, дея хабар беради «Дарё» нашри.

АҚШ адлия вазирлигининг маълумотларига кўра, Уитт Эрон махсус хизматига АҚШ разведкасига қарши операцияларда ёрдам берган.
Уитт Эрон расмийларига махфий разведка маълумотларини етказиб бериш, шунингдек, Америка разведка хизмати ходимининг шахсини очганликда айбланмоқда.

13 февраль куни АҚШ Эроннинг тўрт нафар фуқаросига ҳам кибержиноят содир этишга уриниш айбловини қўйган.
Қўшма Штатлар айни дамда озодликда бўлган Уиттни ҳибсга олиш тўғрисида қарор чиқарган. 2013 йилда Уитт Эронга қочиб кетган эди.

Уитт 1997—2008 йилларда АҚШ ҳаво кучларининг разведка хизмати ва Ҳаво кучлари махсус тадқиқотлар бўлими ходими, кейин эса 2010 йилгача Пентагонга пудратчи сифатида ишлаган. Ўз фаолияти давомида Уитт махфий маълумотларга киришга муваффақ бўлган ва махфий разведка амалиётлари учун чет элга жўнатилган.

2012 йилнинг февраль ойида Уитт Эронга «New Horizon Organization» томонидан ташкил этилган конференцияга борган. Кейин Уитт Эроннинг Америка фуқароси бўлган шахс билан боғланиб, 2013 йилда Эронга қайтган. Шундан сўнг, Эрон ҳукумати Уиттга компьютер ускуналари ва турар жой ажратиб берган.

Натижада, Уитт Эрон расмийларига махфий маълумотлар етказиб турган.
Шуларни инобатга олиб АҚШ Молия вазирлиги Эрондаги иккита компания ва уларга алоқадор тўққиз кишини Эрон бўйича санкциялар рўйхатига кирганини эълон қилган. “Замин” янгиликларини “Youtube”да кузатиб боринг