Alibaba асосчиси ҳафтада олти кун суткасига 12 соатдан ишлашни ёқлаб чиқди

Alibaba Group асосчиси, миллиардер Жек Ма Хитой интернет-компаниялари, жумладан Alibaba компаниясида ортиғи билан ишлашни ёқлаб чиқди, деб хабар берди Kun.uz нашри.
Бизнесмен Alibaba ходимлари билан учрашувда бу борада ўз фикрини баён этди.

“Эрталаб тўққиздан кечқурун тўққизгача ишлаш имкониятини неъмат деб ўйлайман. Бу дунёда ҳаммамиз омад, тўкис ҳаёт ва атрофдагиларнинг ҳурматини орзу қиламиз. Аммо айтинг-чи, бошқаларга нисбатан кўп вақт ва куч сарфламасдан бунга қандай эришишингиз мумкин?”, деди у.

Ма Alibaba компаниясида ишлашни истайдиганлар кунига 12 соатдан ишлашга тайёр бўлишлари кераклигини қўшиб қўйди.

У 1999 йилда компаниясини ташкил этганида ўзи ҳам қаттиқ ишлаганини эслатди. Унинг сўзларига кўра, узоқ давом этадиган иш куни ҳаётининг бир қисмига айланган ва кунига 12 соатдан ишлашни бахт деб билади.

Хитой ИТ-компанияларида меъёридан ортиқ ишлаш муаммоси апрель ойи бошида кўтарилди. Фаоллар гуруҳи GitHub платформасида ходимлар кунига 12 соатдан ишлаётганликлари устидан шикоят қилишлари мумкин бўлган саҳифа ташкил этди.

Саҳифа ташкил қилинган куннинг эртасига Хитой компаниялари браузерлари, жумладан Alibaba’нинг UC Browser ва Tencent’нинг QQ Browser браузерлари GitHub саҳифаларига киришни тўсиб қўйди.

Янгиликлар