Зеленскийнинг маслаҳатчиси Россия билан уруш давом эттирилишини ваъда қилди

Украинанинг янги сайланган президенти Владимир Зеленский мамлакат Россия билан уруш ҳолатида деб ҳисоблайди. Бу ҳақда Зеленскийнинг вакиллари маълум қилишди.

«Биз Украинанинг НАТОга кириши учун ҳаракатларни тўхтатмаймиз. Шунингдек, Украинанинг сайланган президенти Россия билан урушда ҳам мамлакат позициясини ўзгартирмайди. Ахир Россия билан уруш кетмоқда», — дейди Зеленскийнинг мудофаа ишлари бўйича маслаҳатчиси Иван Апаршин. У Владимир Зеленский мудофаа соҳасида коррупцияга қарши курашишини ва Украина армиясида ислоҳотлар ўтказилишини қўшимча қилган.

АҚШнинг Украина масалалари бўйича вакили Курт Волкер шу кунларда Киевга ташрифи давомида Россиянинг агрессив ҳаракатларини қоралади. Волкер Россияни Донбассни Украинага қайтаришга чақирди. Унинг айтишича, Россия Минск келишувининг шартларини бажармаяпти.

Зеленсийнинг ҳомийси экани айтиладиган украиналик миллиардер Игорь Коломойский эса Украинада фуқаролик уруши кетаётгани ҳақида гапирди. Унинг айтишича, Донбассда украиналиклар бошқа украиналиклар билан жанг қилишмоқда: «Бизда фуқаролик уруши давом этмоқда. У мамлакатнинг ҳамма ерида бўлмаётганидан хурсанд бўлишимиз керак. Донбасс урушнинг қайноқ нуқтаси, урушнинг совуғи эса бутун мамлакатга тарқалган», — дейди Коломойский таъсирли нутқ сўзлар экан.

Рус матбуоти юқорида номи тилга олинган, Зеленскийнинг мудофаа ишлари бўйича маслаҳатчиси, полковник Апаршиннинг чиқишларига алоҳида урғу бермоқда. Ўта радикал қарашлари билан шов-шувларга сабаб бўлаётган полковник мудофаа вазири бўлмоқчилигини айтиб, уруш ҳолатида қандай йўл тутмоқчи эканини яширмаяпти.

Апаршиннинг Украинанинг «НАТОга киргунига қадар» хавфсизлигини таъминлаш ҳақида айтган сўзлари айниқса фикрлашга ундайди. Демак, у мамлакатнинг альянсга киришига шубҳа қилмаяпти ва унга киргунга қадар бўлган муддатни алоҳида босқич деб атамоқда. Шунингдек, Апаршиннинг «душман кутмаган вақтда унга зарба бериш», «Украина армиясининг устунлиги ностандарт ҳаракат қилишда экани» ҳақидаги гаплари у очиқчасига урушга тайёрланаётганини кўрсатади. Аввалроқ Зеленский мамлакатда армияни ихтиёрий қилишни ва қўшинларнинг тайёргарлигини НАТО даражасига кўтармоқчи экани айтилганди.

Россия президенти Владимир Путин адаши Владимир Зеленский билан учрашиши мумкинлигини истисно қилмади. Россия етакчиси Украинанинг янги раҳбарияти билан учрашувда аввало Донбассдаги вазиятни муҳокама қилишини айтди. Путиннинг матбуот котиби Дмитрий Песков президентнинг Зеленский билан учрашуви эҳтимоли ҳақида гапирар экан, Путин Украинанинг янги раҳбарияти, хусусан Зеленский билан «Украина томонининг ҳаракатларидан келиб чиқиб» муносабатда бўлишини айтганди.

Украина оппозицион ҳаракати «Ҳаёт учун» вакиллари эса «Россия билан апоқ-чапоқ бўлиш» ёки «оғиз бурун ўпишиш» ярамаслигини, аммо мамлакатнинг иқтисодий барқарорлиги учун Москва билан муроса қилиш кераклигини айтишмоқда. Уларнинг ўйлашича, Зеленский шундагина арзон газ ва рус инвестициясига умид қилиши мумкин.

Зеленский сайловларда ғалаба қозонганидан сўнг Путинга сиёсий ҳазил қилишга ҳам улгурганди. Путин Украинадаги сайловлар тугаши билан Донбассда истиқомат қилувчилар учун Россия паспортини бериш тартиби соддалаштирилгани борасидаги фармонни имзолаган ва келажакда Украинанинг барча фуқаролари учун Россия паспорти беришни соддалаштиришни таклиф қилганди.

Зеленский бу ҳақда гапирар экан шундай деганди: «Ким Россияга кетишни хоҳлаши мумкин? Бизнинг мамлакатда ўз ваколатидан фойдаланиб кўп пул орттирган амалдорлар. Жаноб Путин овора бўлиб ўтириши шарт эмас, агар у хоҳласа, биз ноқонуний пул орттирган мансабдорларнинг рўйхатини юборамиз».

Зеленский шунингдек, «Россия Украинадан тортиб олган ҳар бир қарич ерини қайтариб беришини» айтган ва Украина «коррупцион тузумдан жабрланаётган барча мамлакат фуқаролари»га ўз паспортини беришини айтиб, Россияни мазах қилганди. «Замин» янгиликларини «Вконтакти»да кузатиб боринг