Рамзон Қодиров АҚШнинг Чеченистон махсус отрядига қарши киритган санкцияларига изоҳ берди

Чеченистон раҳбари Рамзон Қодиров АҚШнинг Чеченистоннинг тезкор жавоб бериш махсус отряди “Терек”ка қарши санкциялар киритиши Вашингтоннинг Чеченистондан қўрқишини англатишини айтди. Қодиров бу ҳақда Telegram-каналида ёзди.

16 май куни АҚШ молия вазирлиги “Магнитский қонуни” бўйича санкциялар рўйхатига Чеченистоннинг “Терек” отряди ва Россиянинг 5 фуқаросини киритди.

Рўйхатга “Шимол” батальонининг собиқ қўмондони Руслан Геремеев, “Терек” қўмондони Абузайд Висмурадов, Геннадий Карлов, Сергей Коссиев, Елена Трикуля киритилган.

Жумладан, россиялик мухолифатчи Борис Немцовнинг оиласи адвокатлари Геремеевни сиёсатчининг қотиллиги буюртмачиси деб аташган.

“Агар АҚШда юқори даражада “Терек” ва Абузайд Висмурадов масалалари муҳокама қилинган бўлса, бу АҚШнинг биз – катта Америкадан олисда бўлган кичкина Чеченистондан қўрқишининг ишончли исботидир”, деб таъкидлаб ўтган Қодиров.

У, шунингдек, АҚШ молия вазирлигининг бу қароридан таажжуб билдириб, “Терек”ни аксилтеррорчилик соҳасидаги дунёдаги энг яхшиларидан бири деб атаган.

“Магнитский қайда-ю, Чеченистон қайда? “Терек”ни Магнитскийга қандай боғлаш мумкин?”, деб қўшимча қилган Қодиров.

2017 йилда АҚШ “Магнитский рўйхати”га Қодировни ҳам киритганди.

“Магнитский рўйхати” 2012 йилда Вашингтонда ишлаб чиқилган. У тергов изоляторида Hermitage Capital юристи Сергей Магнитскийнинг ўлимига алоқадор шахслар доирасини белгилаган ва бир қатор россиялик амалдорларга нисбатан виза ва молиявий санкцияларни жорий қилган.

2017 йилда АҚШ “Магнитский қонуни” таъсирини бутун дунёга ёйган. Бу Вашингтон фикрича коррупция ва инсон ҳуқуқлари бузилишига алоқадор бўлган барчага қарши санкциялар киритишга имкон беради.