16:53 / 14.07.2019
3 314

Россияда қашшоқлашиш белгилари. Аҳолининг овқатланиш харажатлари ошмоқда

Россияда қашшоқлашиш белгилари. Аҳолининг овқатланиш харажатлари ошмоқда
Фото: «РИА Новости»
Россияликлар 2019 йилнинг иккинчи кварталида маошининг 38,9 фоизини овқатга сарфлади. Бу ҳақда Сбербанк томонидан ҳар кварталда ўтказиладиган сўровномада маълум қилинган.

Банк томонидан билдирилишича, овқатланиш учун харажатларнинг ошишига сабаб юқори инфляция ва аҳоли даромадининг тушиши билан боғлиқ. Россия статистика қўмитаси 2019 йилнинг биринчи ярмида инфляция даражаси 5,9 фоизни ташкил этганини маълум қилган эди. Йилнинг биринчи ярмида россияликларнинг реал даромади 2,3 фоизга тушиб кетган ва йилнинг иккинчи ярмида тушишда давом этиши айтилмоқда.

Россияликларнинг даромади овқатдан сўнг коммунал тўловлар (15,4 фоиз), кийим-кечак (10 фоиз), соғлиқни сақлаш (7,1) фоиз ва кредитларни узиш (6,6) учун сарфланмоқда. Альфа-банк иқтисодчиси Наталия Орлова томонидан таъкидланишича, овқатланиш харажатларининг ошиши — аҳолининг қашшоқлашиши ва ўрта табақа вакилларининг камайиб бораётгани белгисидир. Сбербанк томонидан маълум қилинишича, аҳолининг 43 фоизида ҳеч қандай жамғарма йўқ ва шу билан биргаликда россияликларнинг қарздорлиги ошиб боряпти.

Қарздорликнинг ўртача кўрсаткичи 10 фоизга ошган ва 260 минг рублга етган. Маълум қилинишича, иқтисодий жиҳатдан бой давлатларда аҳолининг 20 фоиз даромади овқатланишга сарфланади. Камбағал давлатларда эса 50 фоиз ва ундан юқори ҳисобланади.

Dasturlash foundation


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Дунё » Россияда қашшоқлашиш белгилари. Аҳолининг овқатланиш харажатлари ошмоқда