Қозоғистонда камбағал одам Lexus’да ёрдам сўраб келди

^{Фото: «Павон.кз»}
Қозоғистоннинг Павлодар шаҳрида камбағал одам Lexus’да ўз боласи учун хайрия ёрдамини сўраб келди, деб ёзмоқда Дарё нашри.

Эркак «Павлодар меҳрибонлари клуби» жамоат фонди иштирокчиларига мурожаат қилган. Бу ҳақда волонтёрлар ўзларининг Instagram’даги саҳифасида маълум қилган. Клуб иштирокчиларининг сўзларига кўра, бу йили уларга болаларини мактабга тайёрлашда қийинчиликка дуч келган қарийб 300 та оила ёрдам сўраб мурожаат қилган.

«Биз бу оилаларни яхши биламиз. Улар ҳақиқатдан ҳам моддий жиҳатдан қийналган. Хайрия мактаб папкаларини бериш учун бир кунни белгиладик. Уларни шахсан ота-оналарнинг қўлларига топширдик. Клубда бир нечта мактаб буюмлари тўплами қолди. Уларни ижтимоий ўқитувчилар берган заҳира рўйхатидаги кам таъминланган оилаларга беришга қарор қилдик», — деган ташкилот иштирокчилари.

Боласи кам таъминланган болалар рўйхатида бўлган оиладан бўлган эркак волонтёрларга ёрдам сўраб келган. Маълумотномага кўра, бу оиладаги эр-хотин 25 минг тенге (65 доллар) ва 31 минг тенге (80 доллар)ойлик олади. Оила кам таъминланган ва кўп фарзандли.

«Бироқ, кейинчалик маълум бўлишича, бу оила бошлиғи Lexus’нинг энг сўнги русумида юради, ўзлари эса сифатли хусусий уйда яшайди. Биз бунга шахсан ишонч ҳосил қилдик. Бизнинг сўзларимиз далиллар билан исботланган. Қимматбаҳо машинага хайрия канцелярия буюмларини жойлашга ҳам уялмади», — деб ёзган волонтёрлар.

Уларнинг таъкидлашича, ота-оналарнинг бу ҳаракати уларнинг кўнглини совутди. Чунки бу нарсалар ҳақиқатгдан ҳам муҳтож оилага берилиши мумкин эди. «Замин»ни Telegram’да ўқинг!