«Ҳаммаси кузда бошланади» — Зеленский президентликнинг 100 куни ҳақида интервью берди

Украина президенти Владимир Зеленский бугунги кунда дунёнинг энг ғалати давлат раҳбарларидан бири сифатида тилга олинади. Мамлакатнинг энг машҳур шоумени ажойиб кунларнинг бирида шу мамлакат президенти бўлишини тасаввур қилиш чиндан ҳам қийин. Бу шоумен фильмлардан бирида президент ролини ўйнаган бўлса ҳам. Ҳа, худди симпсонлар мультфильмидаги воқеалар тўғри чиқавергани каби Зеленский ҳам «Слуга народа» фильмида президент ролини ўйнаган.

Эндиликда Украина президентига айланган Зеленский Игорь Коломойскийнинг «1+1» телеканалига президентлигининг 100 куни қандай ўтгани ҳақида интервью берди. Зеленскийга юқорида номи тилга олинган фильмда бош вазир ролини ўйнаган Станислав Боклан суҳбатдош бўлди. Интервью давомида Украина президенти кўплаб мавзулардаги саволларга қисқа-қисқа жавоб берди.

«Президент иссиқ ваннада ётиши ярамайди...»

^{Алена ва Владимир Зеленский}
Ижтимоий тармоқлардаги саҳифаларида унинг номидан ким изоҳ қолдириши ҳақидаги саволга Зеленский қисқа жавоб берди: «Шахсан ўзим ёзаман». Аёли билан қайси мавзуларда маслаҳат қилиши ҳақида саволга жавоб берар экан Украина етакчиси хотинини ақлли аёл деб атади: «Жуда мураккаб ҳолатларда у билан маслаҳат қиламан. У жуда ақлли аёл. Одамга тўғрисини айта оладиган дўст керак. Иссиқ ваннада чўзилиб ётишдан наф йўқ, айниқса сен Украина президенти бўлсанг».

«Онам ҳозир ҳам кунига уч марта қўнғироқ қилади»
Зеленскийнинг айтишича, у қайси лавозимда ишлаётганидан қатъи назар онасининг фарзанди бўлиб қолган: «Онам олдин ҳам кунига уч марта қўнғироқ қиларди. Ҳозир ҳам бу одатини ташламаган (кулади). Отам билан эса кўпроқ гаплашадиган бўлдик. У билан анча яқинлашдим. Отам олдин умуман айтмаган гапларини ҳам айтади. Телефонда у менга ўта жиддий масалаларда ҳам маслаҳатлар беради».

«Хавф бор, кимданлигини айта олмайман»

Владимир Зеленский ва президент офиси раҳбари Андрей Богдан
Суҳбатдошлар Зеленскийнинг уйидаги суҳбатни тўхтатиб, қолганини машинада давом эттиришди. Шунда Зеленскийдан «Нега велосипедда юрмаяпмиз?», деб сўрашди («Слуга народа» фильмида президент ролини ўйнаган Зеленский велосипедда юради). Президент бунинг сабабини тушунтирди: «Қийин савол. Мен бунга ҳаракат қилдим, аммо рухсат беришмади. Ҳозирча чиндан хавф бор... кимдан эканини, унинг фамилиясини айтмайман, аммо хавф чиндан мавжуд. Баъзи ҳолатларда бунга гувоҳ бўлдим».

Зеленский ўзининг ташрифи давомида йўллар ёпилмаётганини айтди: «Биз йўлларни ёпмаймиз дегандик ва ёпмаяпмиз ҳам». Яқинда Исроил бош вазири Бенямин Нетаняхунинг ташрифи вақтида Киевдаги кўплаб йўллар ёпилганди, аммо Украина хавфсизлик хизмати вакилларининг айтишларича, йўллар Исроил томони талаби билан ёпилган. Бу саволнинг давоми ўлароқ Зеленскийдан нега президентлик самолётларини сотмаётганини сўрашди: «Мен борадиган ерларга фуқаролик самолётлари бормайди». Зеленскийнинг айтишича, «биринчи рақамли борт» президентлик вазифаларини бажариш учун керак.

«Путин билан ҳеч қандай алоқам йўқ»

Зеленскийдан Путин билан алоқалари ҳақида сўрашганида у қисқа жавоб берди: «Путин билан ҳеч қандай алоқам йўқ». Унинг айтишича, Путинга трибуналнинг қароридан кейин ҳам украиналик денгизчилар қўйиб юборилмагани масаласида қўнғироқ қилишга мажбур бўлган: «Биринчи марта 30 дақиқача гаплашдик. Аввалига танишиб олдик, кейин денгизчиларнинг қайтарилиши, Донбассдаги уруш ҳақида гаплашдик. У ўзида бор маълумотлар билан, мен ўзимдаги маълумотлар билан ўртоқлашдик. Таассуфки, ундаги маълумотлар меникидан фарқ қиларди. Кейинги сафар ўт очишни тўхтатишга келишдик, аммо ўзингиз кўряпсиз Донбассда нималар бўлиб ётибди. Учинчи учрашув эса юзма-юз ўтказилади».

«Ишонинг, ўғрилик камайди»
Зеленский мамлакатнинг ялпи ички маҳсулоти коррупциянинг камайгани ҳисобига ортгани ҳақида фикр билдирди: «Ишонинг, улар қўрқа бошлашди. Чегарада контрабанда бир неча баробарга камайди. Бундай маҳсулотларни олиб келаётганлар уни қаерга олиб боришни билмай ўтиришибди. Солиқ ва божхона ислоҳотидан сўнг контрабандага барҳам беришимиз мумкин. 2019 йил охирига қадар бу ислоҳотларни ўтказишимиз керак»

«Кузда бошланади»
Зеленский сайлов кампанияси давомида коррупцияга аралашганларни жазолаши ҳақида айтганди. Унинг айтишича, тез орада ҳаммаси бошланади: «Кузда бошланади. Бу учун эса янги бош прокурор керак. Коррупцияга қарши суд 5 сентябрда фаолиятини бошлайди».

«Барчанинг тили ва эътиқодини ҳимоя қиладиган модель керак»

Зеленский суҳбат орасида мамлакатда яшаётган бошқа миллатдагиларнинг тили ва эътиқодини ҳимоя қилиш кераклигини айтиб ўтди. Унга савол рус тили борасида берилди (айнан рус тили деб айтилган бўлмаса ҳам). Олдинги президент Порошенко вақтида Украинада рус тилида гаплашадиганларга кескин чекловлар қўйилганди. Зеленский эса ҳамма ўз тилида гаплаша олиши кераклигини айтди: «Биз мамлакатдаги барча миллатларнинг ҳуқуқларини ҳимоя қилишимиз керак. Одамларнинг тили ва эътиқодини ҳимоя қиладиган модель керак».

Зеленский президентлик роли ва чинакам президентликни солиштирар экан ортиқ роль ўйнаш ярамаслигини айтди: «Ортиқ актёр эмасман». Президентдан 100 кун давомида алкогол ичган ёки йўқлиги ҳақида ҳам сўрашди: «Ичдим, лекин кўрганингиздек мен оёқда турибман», — деб жавоб берди Владимир Зеленский.

Манба: Kun.uz «Замин»ни Telegram’да ўқинг!