10:37 / 02.11.2019

«Яндекс»га қарши Алишер Усмонов, Герман Греф ва Сергей Чемезов бирлашди

Россиянинг «Сбербанк»и Mail.ru Group’даги «Газпромбанк»нинг улушини сотиб олади, бу ҳақда иккала банк келишувга эришди. Mail.ru’нинг яна бир ҳамкори «Ростех» давлат корпорациясидир. Бу учлик россияликлар ҳаётининг барча жабҳаларидаги рақамли технологияларнинг катта қисмига эгалик қилишади, деб ёзади Sof.uz нашри.

Герман Греф, Алишер Усмонов, Сергей Чемезов «MF Technology» компанияси ёрдамида Mail.ru Group’нинг А синфидаги 100% акцияларига эгалик қилади. Бу акциялар пакети 58.89% овозлар сони ёки компаниянинг 5.23% иқтисодий улуши, демакдир (А синфидаги битта акция 25 та оддий акцияга тўғри келади).

Кучли учлик
Учликдаги биринчи шахс – Герман Греф «Сбербанк»нинг президенти бўлиб, айнан у банкни Россиядаги IT-гигантлардан бирига айлантирди. Греф мамлакатни рақамли форматга ўтказиш бўйича ўтказиладиган Путиннинг барча йиғилиш ва конференцияларида асосий маърузачилардан биридир. Сентябрда бутун мамлакат бўйлаб «Сбербанк» тажрибасини ёйиш бўйича шахсан биринчи рақамли минбардан туриб буйруқ берилди.

Алишер Усмонов – келиб чиқиши Ўзбекистондан бўлган миллиардер 2010 йилларда Facebook ва бошқа Америка IT-ширкатларидаги улушларидан катта даромад кўраётган эди. Бироқ Россия ва Ғарб орасига совуқчилик тушгач, Усмонов чет элдаги активларини қайтариб олди.

Сергей Чемезов бошчилигидаги «Ростех» мамлакат иқтисодиётини рақамлаштириш бўйича давлат дастури ижросини таъминлайдиган асосий фигуралардан бири. Унинг зиммасига 5G тармоғини ўрнатишдан тортиб сунъий интеллектни яратишгача бўлган кенг кўламли ишлар тушган.

Ёлғиз «Яндекс»
Mail.ru Group, «Сбербанк» ва «Ростех» альянсига мамлакатда биттагина компания рақобат қила олиши мумкин: «Яндекс».

Тасодифми ёки йўқми, лекин Mail.ru ва «Сбербанк»нинг июль ойидаги стратегик шериклик тўғрисидаги келишувидан сўнг, «Яндекс» жиддий муаммоларга дуч кела бошлади: депутат Антон Горелкин интернет ресурсларидан фойдаланишга доир янги қонун лойиҳасини тақдим қилди. Ноябрь ойида Думада кўриб чиқиладиган қонундан «Яндекс» нақ 1.5 млрд. АҚШ доллари миқдорида зарар кўриб улгурди.