Хитой Австралиядан бошпана сўраган «жосус»ни товламачи деб атади

^{Фото: Reuters}
Австралиядан сиёсий бошпана сўраган гўёки Хитой махсус хизмати ходими бўлган шахс аслида товламачи бўлиб, илгари ана шундай жинояти учун судланган, деб маълум қилди Хитой жамоат хавфсизлиги вазирлигининг Шанхайдаги бўлинмаси.

"Ўзини хитойлик "махсус агент" деб атаган Ван Лицян Фуцзянь провинциясида туғилган бўлиб, 26 ёшда, ишсиз, суд ишига алоқадорлиги сабабли қочиб юрибди", - дейилади бўлинма баёнотида.

Шанхай полициясининг маълумотига кўра, Ван Лицян 2016 йил октябрда Фуцзянь провинцияси халқ суди томонидан товламачилиги учун бир йилу уч ойга озодликдан маҳрум қилинган.

Қайд этилишича, Ван Лицян 2019 йил февралда 4,5 миллион юань миқдоридаги яна бир товламачилик ишига аралашиб қолган. У апрелда Ҳонгконгга ўтиб кетган. Текширувларга кўра, унинг паспорти ва Ҳонгконг фуқароси эканлиги ҳақидаги ҳужжат сохта эканлиги аниқланган.

Аввалроқ Лицян Австралия нашрларига берган интервьюсида Австралия хавфсизлик ва разведка хизматига (ASIO) Хитой ҳарбий разведкасининг Ҳонгконгдаги катта офицерлари шахсини ошкор қилганини айтган. Бундан ташқари, у Австралия махсус хизматига Пекин Ҳонгконг, Тайван ва Австралиянинг сиёсий ишларига қандай аралашиши ва молиялаштириши тўғрисидаги маълумотларни тақдим этганлигини маълум қилган.

Лицяннинг айтишича, у Тайванда аҳолининг сиёсий қарашларини ўзгартириш билан шуғулланувчи «киберармия» фаолиятини бошқарган.

Янгиликлар