Америкалик имомнинг Трампга мактуби: “Ҳафсаламни пир қилдингиз”

Мичиган штатилик имом Муҳаммад Али Элаҳи АҚШ президенти Дональд Трампга очиқ хат йўллади, дея ёзади Azon.uz нашри Press&Guide нашрига таяниб.

“Жаноб Президент! Ҳозир йил боши ва у уруш, зўравонлик, қон тўкиш ва терроризм билан эмас, балки тинчлик, ярашиш, кечириш ва дўстлик билан боғлиқ бўлиши керак, – дея бошланади Дирборндаги Ислом маркази вакили, имом Муҳаммад Али Элаҳининг мактуби.
– Мен сизга овоз бермаганман, лекин сиз ҳозир Америка Қўшма Штатлари президентисиз ва мамлакатимиз номидан гапираётганингиз учун мен Америка фуқароси сифатида ҳиссиётларим билан бўлишишим керак. Сиз гўзал мамлакатимизни қандай бошқараётганингиздан жуда хафаман ва ҳафсалам пир бўлди.

Сўнгги 3 йил ичида кўпчилигимиз Твиттердаги мунозарали, чалкаш ва ёлғон гапларингиз, сўзларингиз ва ҳаракатларингиздан азият чекмоқда. Сизнинг сиёсий йўлингиз нафақат исломофоб кучларни, балки Шарлоттсвилда ва бошқа жойларда антисемитизм шиорларини қўллаган кучларни ҳам руҳлантирди”.

“Жамол Қошиқчининг даҳшатли суиқасдига келсак, сиз ахлоқни пулга алмаштирдингиз ва бечора журналист ўрнига қотил-монархияни қўллаб-қувватладингиз. Аммо сизнинг энг даҳшатли, телбаларча ва шафқатсиз муносабатингиз Эронга нисбатан бўлди. Сиз генерал Сулаймоний ва унинг қўшинлари юзлаб Америка фуқаролари ва ҳарбий хизматчиларига ҳужум қилди, ярадор қилди ва ўлдирди деб айтдингиз. Бу ҳақиқатми? Бу қанақасига мумкин, биринчи марта эшитишимиз-ку бунақасини. Ундай бўлса, далилларингизни кўрсатинг! 11 сентябрь куни минглаб мусулмонлар Манҳеттенда байрам қилган деган сўзларингизни эслаймиз. Воқеликда эса буни ҳеч ким кўрмаган, фотосурат ҳам, видео ҳам йўқ”.

Мактубининг охирида имом америкаликларни “бутун глобал қишлоқ”қа тинчлик ва тотувлик сўраб дуо қилишга чақирган. “Замин” янгиликларини “Telegram”да кузатиб боринг