16:15 / 02.02.2020

Уханда коронавирусга чалинганлар учун мўлжалланган илк шифохона 10 кунда қуриб битказилди

Бу ҳақда Хитой ОАВ хабар берди. “Хошэньшань” госпитали минг ўринга мўлжалланган бўлиб, у ерда 1,4 минг ҳарбий тиббиётчи ишлайди.
Шифохона қурилиши 23 январь кечки пайт бошланган ва уни 3 февралгача қуриб битказишга ваъда берилганди. Шундан кейин касаллар учун каттароқ яна битта шифохона қуришга қарор қилинганди.

^{Фото: Getty Images}

^{Фото: Shutterstock}

^{Фото: Getty Images}
“Лэйшэньшань” деб номланадиган иккинчи шифохонани 6 февралгача қуриб битказиш режалаштирилган. Унинг майдони 60 минг квадрат метрни ташкил қилади ва ундан 51 минг квадрат метри бевосита беморларни карантин шароитларида жойлаштиришга мўлжалланган. Бу ерда 1600 та койка жойлаштириш мумкин бўлади. Қолган 9 минг квадрат метр майдон эса шифокорлар учун ажратилади.

Иккала шифохонани ҳам 2003 йил апрелида атипик зотилжам эпидемияси вақтида Пекинда қурилган “Сяотаншань” шифохонаси модели бўйича қуришга қарор қилинганди.

Хитой раиси Си Цзиньпин “Хошэньшань” шифохонасига 1,4 минг ҳарбий тиббиётчи юборилишини эълон қилди. Бу ерда асосан коронавирусга чалингани тасдиқланган беморлар жойлаштирилади. Шифохонада, интенсив даволаш, умумий даволаш, оғир касалларга мўлжалланган ҳамда инфекцияни назорат қилиш, диагностика бўлимлари жойлашади.

Бундан ташқари, шифохонадаги эпидемиологик вазиятни назорат қилиш ва унинг олдини олишни бошқариш учун 15 кишидан иборат экспертлар гуруҳи ташкил этилди.

“Хошэньшань”га юборилаётган тиббиётчиларнинг аксарияти атипик зотилжам эпидемияси вақтида “Сяотаншань” шифохонасида ишлаган ёки Сьерра-Леоне ҳамда Либерияда Эбола безгагига қарши курашда иштирок этган ҳамда юқумли касалликларни даволашда бой тажрибага эга мутахассислар ҳисобланади.