АҚШ «Толибон» тинчлик битими шартларига риоя қилиш ниятида эмаслигидан хабар топди

^{Фото: AP Photo}
Америка разведкаси Оқ уйга бир ҳафта олдин АҚШ билан тинчлик битимини имзолаган «Толибон» ҳаракати келишув шартларига риоя қилиш ниятида эмаслигини маълум қилди, деб хабар беради «РБК»га таяниб Дарё нашри.

NBC телеканалининг маълум қилишича, Америка разведкасининг Покистондаги манбалари «Толибон» америкаликлар Афғонистондан чиқиб кетгунига қадар келишув шартларига риоя қилишини, шундан сўнг ҳукумат қўшинларининг позициясига ҳужум уюштиришини билдирган.

«Биз афғон ҳукуматига ва бошқа партияларга шуни эълон қиламизки, АҚШ бизни тан олган экан, улар мамлакатни бизнинг қўлимизга бериши керак», — дейди «Толибон» вакилларидан бири.

«Толибон» билан келишувни ўз сайловолди дастуридаги ваъданинг амалга оширилиши дея баҳолаган АҚШ президенти Дональд Трамп Америка қўшинлари Афғонистондан олиб чиқиб кетилгач, амалдаги ҳукуматни ағдаришга уриниш бўлиши мумкинлигини таъкидлаган.

Ўз навбатида «Толибон» билан тинчлик шартномасини тайёрлашга алоқадор, аммо ҳозирда администрацияда ишламаётган NBC суҳбатдошининг айтишича, Вашингтондагилар вазиятнинг нимага олиб келишини яхши билади. Улар Америка қўшинлари Вьетнамдан чиқиб кетгач, у ерда содир бўлган вазиятни яхши эслайди. «Ушбу мавзу ҳақида ҳеч ким очиқ гапирмаган», дейди NBC суҳбатдоши.

Эслатиб ўтамиз, 29 февраль, шанба, куни Қатар пойтахти Доҳада АҚШнинг Афғонистон бўйича махсус вакили Залмай Ҳалилзод ҳамда «Толибон» етакчисининг ўринбосари, ҳаракатнинг Қатардаги офиси раҳбари мулла Абдулла Ғани Бародар келишув битимини имзолаган эди. Ўзбекистон ташқи ишлар вазири Абдулазиз Комилов бошчилигидаги делегация ҳам ушбу тинчлик музокараларида иштирок этган. «Толибон» Ўзбекистоннинг Афғонистон можаросини ҳал этишдаги саъй-ҳаракатларини эътироф этган эди. «Замин» янгиликларини «Вконтакти»да кузатиб боринг