Россиялик депутат ахлоқсиз сўз ёзилган футболкада йиғилишга келиб, Путинни танқид қилди

^{Фото: Видеодан кадр}
Москва шаҳар думаси депутати Дарья Беседина дума йиғилишига ахлоқсиз сўз ёзилган футболкада келиб, конституцияга Россия президенти Владимир Путиннинг президентлик муддатларини “ноллаштириш” таклиф қилинаётган тузатма киритилишини танқид қилди.

Депутатнинг футболкасида сўз ўйини тариқасида “Öбнулись” (“ақлдан озибсизлар” маъносида) сўзи ёзилган бўлган.
Бесединанинг фикрича, конституцияга тузатмалар “Путин Россияни яна 16 йил бошқариши учун” атайлаб ишланган.

Аввалроқ Россия давлат думаси депутати, биринчи аёл фазогир Валентина Терешкова конституцияга Путиннинг президентлик муддатларини ноллаштирувчи тузатмани киритишни таклиф қилган. Дума бу тузатмани қўллаб-қувватлаган.

“Мен давлатимда Владимир Путин таклиф қила оладигандан яхшироқ келажак борлигига ишонаман. Бироқ Путин бу келажакнинг бошқа муқобилини кўрмаяпти. У умрининг охиригача ҳукмронлик қилмоқчи ва ҳокимиятни ушлаб қолиш учун барча ишга бормоқда”, деб айтган Беседина ўз нутқида.

Шундан кейин Москва шаҳар думаси раиси ўринбосари Степан Орлов Бесединанинг нутқида “кескин оҳанг” бўлганини таъкидлаб, регламент бўйича комиссиядан Бесединани регламентга ва Россия қонунларига “мувофиқлиги ёки мувофиқмаслигини” текширишни сўраган.

Бундан ташқари, “Единая Россия” депутати Александр Семенников Бесединанинг футболкасидаги ёзувни танқид қилган ва у депутатнинг “руҳий ҳолати”ни кўрсатишини айтган.

“Депутат унинг ўша вақтдаги руҳий ҳолатини кўрсатувчи ахлоқсиз сўз ёзилган футболкада бўлган. Фикримча, одамлар кўкрагида уят сўзларни ёзиб, у билан минбарга чиқишига йўл қўйиб бўлмайди”, деб айтган Семенников.