Дунёдаги вазият: АҚШ ремдесивирни маъқуллади, Испания карантинни юмшатди

^{Фото: Reuters}
АҚШнинг Озиқ-овқат маҳсулотлари ва дори воситалари сифати бўйича санитария назорати бошқармаси (Food and Drug Administration — FDA) ўз вақтида Эболани даволашда қўлланган ремдесивир препаратидан коронавирусга қарши фойдаланишга расман тавсия қилди.

Бу қарор шошилинч чора сифатида қабул қилинди, энди ремдесивир Америка шифохоналарида оғир беморларни даволашда қўлланиши мумкин. «Бу Covid-19 учун тавсия этилган илк терапиядир. Биз бунда иштирок этишдан фахрдамиз», деган FDA раҳбари Стивен Хон.

Шу ҳафтада АҚШда ремдесивирнинг клиник синовининг илк натижалари эълон қилинганди ва унга кўра ушбу препарат коронавирусга қарши курашда самарали экани, у тузалиш жараёнини сезиларли даражада тезлаштириши тасдиқланганди. АҚШ аллергия ва инфекцион касалликлар Миллий институти (NIAID) бу борада махсус баёнот берди.

Шу билан бирга, FDA’нинг ҳозирги қарори фавқулодда ҳолатлар учун қабул қилинган, препарат тўлиқ фойдаланиши маъқулланиши учун кўп вақт талаб этилади.

Экспертлар ремдесивирни коронавирус давоси деб ҳисоблаш керак эмаслигини, аввалроқ ўтказилган бир неча тадқиқот унинг самарадорлигини тасдиқламаганини айтишмоқда.

Хусусан, 29 апрель куни Lancet журнали Хитойда ўтказилган синовлар натижаларини эълон қилди, унга кўра препарат Covid-19ни даволашда самарали эмаслиги маълум бўлган. Шу билан биргаликда, хитойликлар АҚШдагидан кўра анча камроқ беморларда тадқиқот ўтказишган.

Бундан ташқари, клиник синовлар ушбу препарат соғайишни тезлаштиришни кўрсатган бўлсада, улар ўлим ҳолатларининг олдини олишга ожиз.
АҚШ биофармацевтик компанияси Gilead Sciences раҳбари Дэниел О'Дэй АҚШ президенти Дональд Трамп билан учрашувда ўз компанияси дорининг 1,5 миллионта дозасини текинга етказиб беришини ваъда қилган.

АҚШ коронавирусдан ҳаммадан кўпроқ зарар кўрган давлатдир. Сўнгги маълумотларга кўра, бу давлатда вирусдан зарарланганлар сони, 1,14 миллиондан ошди, 66,6 мингдан ортиқ бемор вафот этди.

Испания карантинни янада юмшатмоқда

^{Испанлар сўнгги ҳафталарда илк марта эрталабки югуришга чиқишди / GETTY IMAGES}
Бу вақтда Испанияда карантиндаги катта ёшли аҳоли кўчада спорт билан шуғулланишга рухсат олди. Шу билан биргаликда, вирус кенг тарқалишининг олдини олиш мақсадида турли ёшлардаги одамлар куннинг турли вақтларида кўчага чиқиши белгиланган. Апрель ойи охирида ҳукумат 14 ёшгача бўлган болаларга кўчага чиқишга рухсат берганди.

BBC мухбирининг хабар беришича, Испаниядаги кўплаб шаҳарларда кўчалар одамлар билан тўла бошлади, баъзида шаҳарлар кўчалари карантиндан олдинги ҳолатдан фарқ қилмай қолмоқда. Шу билан биргаликда, кўчаларда машиналар кам, одамлар ижтимоий масофа сақлаш тартибига риоя этишмоқда.

Қайд этиш керакки, бу вақтгача Испания Европада энг қатъий карантин чоралари жорий этилган мамлакат эди - одамлар кўчага фақат зарурат юзасидан (ишга, озиқ-овқат ва дори-дармон харид қилиш учун) чиқиши мумкин эди. Шунингдек, Испания сўнгги ҳафтагача болалар уйни тарк этиши тақиқланган Европанинг ягона мамлакати бўлиб турганди.

Испанияда Covid-19’дан вафот этиш камайиши давом этмоқда, бу мамлакат Европада зарарланиш ҳолатлари энг кўп қайд этилган мамлакатдир. Сўнгги маълумотларга кўра, 213,4 мингдан ортиқ кишида касаллик аниқланган, шундан 25,5 минг киши вафот этган. Шанба куни Испанияда коронавирусга чалиниш оқибатида 276 киши вафот этди, бир кун олдинги кўрсаткич 281та бўлганди.

Agence France-Presse агентлиги хабар беришича, жума куни Мадриддаги Covid-19 беморлари учун ташкил этилган дала госпиталининг ёпилиш маросимида юзлаб кишилар иштирок этишди.

^{Испан сиёсатчилари шифохона ёпилишида ижтимоий масофа сақлаш тартибига риоя этилмаганидан норози / GETTY IMAGES}
Ижтимоий тармоқ фойдаланувчилари шифохонага келган сиёсатчилар, журналистлар ва тиббиёт ходимлари бир-бирларига яқин турган ҳолда ижтимоий масофа сақлаш тартибига риоя этишмаганини танқид қилишмоқда.

«У ерда тахминан мингга яқин киши бор эди, ижтимоий масофа сақлаш тартибига умуман риоя этилмади, Испания ҳукумати телевидение орқали доимо эслатиб турган бошқа чораларга ҳам», - дея мамлакат парламенти депутати Пабло Перпиньонинг сўзларини келтирмоқда AFP.

Испания ҳукумати мамлакат 11 майда карантиндан чиқишни бошлаши ҳақида маълум қилган, шу билан биргаликда июнь ойи охиригача оммавий тадбирларга тақиқлар сақланиб қолади.

Европанинг бошқа бир неча давлати ҳам карантин чоралари бекор қилиниши ҳақида маълум қилмоқда. Австрияда барча дўконлар очилмоқда, Германияда душанба кунидан черковлар, музейлар ва болалар майдончалари ишлай бошлайди.

«Евростар»да - фақат ниқобда
Буюк Британиядан Франция ва Бельгияга «Евростар» поездида сафар қилувчилар тиббий ниқобда бўлиши шарт ҳисобланади. Ҳукумат одамлар оғзи ва бурнини исталган восита билан тўсиши мумкинлигини билдирган, яъни фақат тиббий ниқоб ва респираторлар бўлиши шарт эмас.

Поездга ниқобсиз чиқмоқчи бўлганларга рухсат берилмайди.
Франция ва Бельгияда тиббий ниқоб тақиш мажбурий ҳисобланади, бунга амал қилмаганлик учун катта жарималар қўлланиши мумкин.

Карантинга қарамай, «Евростар» сафарларни уюштиришни давом эттирмоқда, лекин рейслар сони камайган. Авваллари Лондондан бир кунда ўндан ортиқ поезд сафарга чиққан бўлса, ҳозирда фақат иккита: Париж ва Брюсселга.

Шу ҳафта ишга қайтган Буюк Британия бош вазири Борис Жонсон тиббий ниқоб тақиш мамлакатда карантин чоралари бекор қилиниши учун зарурлигини айтиб ўтди

Ҳиндистон яна икки ҳафта карантинда
Жума куни Ҳиндистон ҳукумати мамлакатда карантин чоралари 4 майдан бошлаб яна икки ҳафта давомида амал қилиши, аммо эпидемиологик вазият нисбатан яхшироқ бўлган ҳудудларда айрим чоралар бекор қилиниши айтилган.

^{Ҳиндистон ҳудудлари вирус тарқалиши даражасига кўра таснифланган / GETTY IMAGES}
Ҳиндистон ҳудудлари уч тоифага ажратилган: қизил (инфекция тарқалиши хавфи юқори даражада сақланиб қолган), яшил (21 кун давомида янги касаллар аниқланмаган) ва апелсинранг (вазият аниқ бўлмаган).

Гарчи айрим чекловлар бутун мамлакат учун амалда бўлсада, «яшил ҳудуд»ларда айрим юмшатишлар кўзга ташланмоқда. Ҳинд нашрларининг ёзишича, мамлакатдаги йирик шаҳарлар, жумладан Деҳли ва Мумбай «қизил ҳудуд»лигича қолмоқда.

Ҳиндистон ҳукумати давлат ва хусусий корхоналар ходимларига ўз смартфонларида коронавирусга чалинганлар билан алоқани кузатиб борувчи илова ўрнатишини мажбурий қилиб қўйган.

Ким коронавирус юқтирганлар билан алоқада бўлгани ҳақида хабардор қилиб турувчи Bridge to Healthcare («Соғлиқни сақлаш учун кўприк») иловаси 50 миллиондан ортиқ киши томонидан кўчириб олинган. «Замин»ни Telegram’да ўқинг!