Шимолий Осетияда коронавирус борлигига ишонмаган аҳоли мобил алоқа антеннасини ёқиб юборди

^{Фото: «РИА Новости»}
Шимолий Осетиянинг Ногир қишлоғи яқинида МТС уяли алоқа антеннаси ёқиб юборилди. «РИА Новости»нинг хабар беришича, бу ҳақда республика раҳбари Вячеслав Битаров онлайн ўтказилган матбуот анжуманида маълум қилди.

Битаровнинг сўзларига кўра, Шимолий Осетиянинг айрим аҳолиси коронавирус мавжуд эмас деган фикрда. У одамларни резервацияга тўплаб, «улар ҳушдан кетиши учун 5G антеннасини қўйиб, нурлантириб, чиплаш» учун ўйлаб топилган, деб ҳисобламоқда. «Ва бундай ўйлайдиганлар етарлича», — деган Битаров.

Унинг қўшимча қилишича, бундай теория тарафдорларига Владикавказда ўзини изоляция қилишга қарши ўтказилган митингда ҳам дуч келган.
«Улар буни менга исботлади, лекин мен улар билан баҳслашиб ўтирмадим. Аммо, афсуски, улар яна давом этиб, хусусан, улар яқинда Ногир қишлоғи яқинидаги МТС антеннасини ёқиб юборишди ва, албатта, қишлоқ аҳолиси алоқасиз қолди», — дейди Битаров.

2 май ҳолатига кўра, Шимолий Осетияда коронавирусга чалиниш бўйича 921 та ҳолат қайд этилган. Касалликка чалинган 86 киши соғайган, 4 нафари вафот этган. “Замин” янгиликларини “Facebook”да кузатиб боринг