Дунёдаги вазият: Жанубий Кореяда вирус яна авж олди, Оқ уйда инфекция, болаларда оғир аломатлар

^{Фото: EPA}
Бутун дунёда Covid-19 ташхиси қўйилганлар сони 4,1 миллиондан ошган, касаллик 282 мингдан ошиқ бемор вафот этган. Карантин чоралари юмшатилган айрим давлатларда касалланиш ҳолатлари ўса бошлади.

Жанубий Корея ҳукумати 9 май куни 18 кишида вирус аниқлангани ҳақида маълум қилди, 10 май куни 34та янги ҳолат ҳақида эълон қилинди - бу сўнгги ой ичидаги энг юқори кунлик ўсиш кўрсаткичи бўлди, шундан 26 ҳолат манбаси мамлакат ичкарисидаги беморлар, 8 ҳолат хориж билан боғлиқ (сўнгги марта 12 апрель куни 32 кишига вирусдан зарарланиш ташхиси қўйилган, 30 апрель куни эса мамлакатда бирорта янги ҳолат қайд этилмаганди). Президент Мун Жэ Ин мамлакатда вирус эпидемиясининг иккинчи тўлқини бошланиши мумкинлиги ҳақида огоҳлантирди.

Мамлакатда 6 майдан фақат эҳтиёткорлик ва профилактика чораларига риоя қилишни кўзда тутувчи «кундалик ҳаётдаги карантин» режими жорий этилганди. Эндиликда ҳукумат чекловларни қайтарди ҳамда барча барлар ва ресторанлар ёпилди.

Бунга коронавирус юқтиргани гумонланган 29 ёшли йигит 2 майга ўтар кечаси Итэвон шаҳридаги 5та тунги клубга бориб, кўп одамлар билан мулоқотда бўлган. Кейинчалик унга вирусдан зарарланиш ташхиси қўйилган. 9 май куни тасдиқланган 18та ҳолатнинг 17таси айнан у билан боғлиқлиги маълум бўлган. Ҳукумат шу вақт оралиғида тунги клубда бўлган 1,5 мингга яқин одамни топиб, уларни текширишни буюрган.

Айни вақтга келиб Жанубий Кореяда коронавирусга чалиниш ҳолатлари сони 10 874тага етди, беморларнинг 9 610 нафари соғайган, 256 нафари вафот этган. 1008 киши шифохоналарда даволанмоқда.

Германияда ҳам янги ҳолатлар ўса бошлади; бу мамлакатда чоршанба куни карантин чоралари енгиллаштирилганди.

^{Германияда ибодатхоналар очилган, аммо ижтимоий масофа сақлаш тартиби сақлаб қолинган / AFP}
Роберт Кох номидаги Инфекцион касалликлар тадқиқотлари бўйича институт маълумотларига кўра, бир кишининг бошқаларга касаллик юқтиришини ифодаловчи репродуктив сон — R кўрсаткичи 1,1’дан ошган. Германияда 9 май куни 736та янги ҳолат қайд этилди, 10 май куни беморлар сони 315тага ошди. Жами зарарланиш ҳолатлари сони 171 639тага етган, 7,5 мингдан ортиқ бемор вафот этган.

Социал-демократлар партиясидан Бундестаг депутати, профессор-вирусолог Карл Лаутербах коронавирус яна кенг кўламда тарқала бошлашидан огоҳлантирди. У шанба куни ўз шаҳри Кёльн кўчаларида тўп-тўп бўлиб юрган ҳамшаҳарларини кўргач, шундай баёнот билан чиқди.

«Бу шунга олиб келадики, R кўрсаткичи бирдан ошади ва биз касаллик геометрик прогрессия тарзида тарқалишига гувоҳ бўламиз. Чоралар юмшатилишига жуда бўш тайёргарлик кўрилган», - дея ёзган у твиттердаги саҳифасида
Коронавирус пандемияси ўчоғи бўлган Уҳан шаҳрида сўнгги бир ойда илк марта Covid-19дан зарарланиш ҳолати қайд этилди.

Ташхис қўйилган 89 ёшли эркак айни вақтда оғир аҳволда шифохонада жойлаштирилган. Унда аввалига касаллик белгилари бўлмаган, аммо тест натижалари унда вирус борлигини кўрсатган.
Хитой соғлиқни сақлаш комиссияси маълумотига кўра, мамлакатда сўнгги бир кунда жами 14та янги ҳолат қайд этилди ва шундан 13тасининг манбаси мамлакат ичкарисида.

Оқ уйда инфекция
АҚШда Оқ уйнинг коронавирус бўйича махсус штабининг 3 нафар ходими Covid-19 ташхиси қўйилган бемор билан алоқада бўлгани учун ўзини изоляция қилди.

^{Америка матбуоти маълумотига кўра, Майк Менснинг матбуот котиби Кети Миллерда вирус аниқланди / REUTERS}
Американинг Politico нашри ёзишича АҚШ вице-президенти Майкл Пенснинг матбуот котиби Кэти Миллерда коронавирус аниқланган.

Икки ҳафталик карантинга кетганлар - АҚШнинг аллергик ва юқумли касалликлар бўйича миллий институти директори Энтони Фаучи, Касалликларни назорат қилиш ва олдини олиш маркази (CDC) раҳбари Роберт Редфилд ва АҚШ соғлиқни сақлаш вазирлигининг озиқ-овқат маҳсулотлари дори-дармонлар сифати масалалари бўйича бош бошқармаси раҳбари Стивен Хан.

Оқ уй вакиллари хабар қилишича, Пенс яқин орада Кейти Миллер билан алоқада бўлмаган. Кейти Миллернинг турмуш ўртоғи Стивен Миллер - Дональд Трампнинг катта маслаҳатчиларидан бири ҳисобланади.

Бироз аввалроқ Пенснинг ёрдамчиси, унга озиқ-овқат ва ичимлик етказиб берадиган ходимда ҳам коронавирус аниқланганди. Оқ уй Пенс ва Трамп ҳар куни коронавирусга тест топшираётгани ва ҳар сафар тест салбий натижа кўрсатаётганини қайд этган.

Нью-Йоркда нафас олиш йўллари ўткир яллиғланиши оқибатида вафот этган уч нафар бола ўлими коронавирус инфекцияси билан боғланаётгани штат губернатори Эндрю Куомони «Covid-19 тарихида мутлақо янги саҳифа» ҳақида огоҳлантиришга мажбур қилди. Экспертлар шу вақтгача коронавирус болаларда фақат кичик аломатларни келтириб чиқаради, деган фикрда эди.

Штат маъмурлари маълумотига кўра, якунланган ҳафтада Нью-Йоркда 73 бола Кавасаки касаллигини (Бу баъзида чақалоқларда ва 1–8 ёшдаги болаларда учрайдиган томир касаллиги. Узоқ муддатли иситма, эксантема, конъюнктивит, шиллиқ пардаларнинг яллиғланиши ва лимфаденопатия билан тавсифланади. Коронар артерия аневризмалари ривожланиши ва ёрилиши ёки миокард инфарктига олиб келиши мумкин) эслатадиган токсик шок белгилари билан шифохонага ётқизилган. «Бу қандайдир янги нарса. Бу ҳали энди ривожланмоқда», - деган Куомо.

Шу билан бирга, тиббий экспертлар ҳозирча болалар ўлими коронавирус билан боғлиқ эканини тасдиқлашмаган.

Европа ва Австралия
Франция ва Испания янги ҳафтадан карантин чораларини янада енгиллаштиришни режалаштирган. Францияда шанба куни 80 киши, якшанба куни 70 киши Covid-19 қурбони бўлди - бу апрель ойи бошидан буён энг паст кўрсаткичлардир. Мамлакатдаги кексалар уйларидаги ўлим кўрсаткичлари ҳам камайган.

^{Мельбурнда карантин чораларига қарши намойиш ўтказилди / AFP}
Испанияда мамлакатнинг ярми душанба кунидан карантиндан чиқишнинг биринчи босқичига ўтади: одамларга 10 нафаргача бўлиб тўпланиш ва кўчалар бўйлаб сайр қилишга рухсат берилади. Ресторанлар савдо қилишни бошлайди (олиб кетишга), бирламчи эҳтиёждаги маҳсулотлар билан савдо қилмайдиган дўконлар ҳам очилади.

Аммо Мадрид, Барселона ва бошқа йирик шаҳарларда чекловлар сақланиб қолинади, бу ҳудудлар ҳамон вирус кенг тарқалган ҳудудлар бўлиб қолмоқда. Бу шаҳарлар карантиндан чиқишнинг биринчи босқичига кириши бир ҳафтага кечиктирилган.

Бельгияда якшанба кунидан 4 нафаргача бўлган кишини меҳмонга чақиришга рухсат берилди. Ўтган ҳафтада мамлакат бош вазири Софи Вильмес одамларга кичик гуруҳлар бўлиб тўпланишга рухсат берилиши режалаштирилаётгани ҳақида маълум қилганди, чунки кўпчилик кўп вақтдан буён яқинларини кўра олмаяпти.

Австралияда якшанба куни полиция Мельбурнда парламент биноси олдида карантин чораларига қарши намойиш уюштирган 10 нафар кишини ҳибсга олди.

150 нафарга яқин киши ижтимоий масофа сақлаш қоидаларини менсимай митинг ўтказди. Ушбу мамлакатда карантин қоидаларини бузганлик учун 1600 Австралия доллари (1045 АҚШ доллари) миқдорида жарима кўзда тутилган.

Австралия босқичма-босқич карантин чораларини юмшатмоқда, мамлакат июль ойига қадар ўз иқтисодиётини коронавирус хавфидан холи қилишга тайёрланмоқда. «Замин»ни Telegram’да ўқинг!