Тадқиқот: спиртли ичимликлар таъсирида коронавирус вакцинаси фойда бермайди

^{Фото: Jon Super/AP/Shutterstock}
Коронавирусга қарши эмлашдан сўнг спиртли ичимликлар ичиш иммунитетни кучсизлантириб, вакцина таъсирини самарасиз қилиши мумкин. Бу ҳақда New Scientist ёзмоқда.

Россиянинг Sputnik V вакцинаси яратувчилари эмлашдан кейин 3 кун давомида спиртли ичимликлардан сақланиш кераклигини айтишган. Aлекcандр Гинтсбургнинг айтишича, огоҳлантириш COVID-19'га қарши ва бошқа турдаги вакциналарга ҳам тегишли.

«Кўп ичадиган одамлар организми инфекцияга мойил бўлади, чунки кучли ичкиликбозлик иммунитетнинг сусайишига сабаб бўлади», дейди Британиянинг Эдинбург университети иммунологи Элеанор Рили.

Россияда Sputnik V вакцинаси синовларида қатнашган тахминан 10 фоиз одамда вакцинадан кейин иммунитет ҳосил бўлмаган. Бу ҳолат бошқа вакцина синовларида ҳам кузатилган. Бунга спиртли ичимликлар сабаб бўлгани аниқ эмас, лекин шундай фараз ҳам йўқ эмас.

AstraZeneca ва Oksford университети вакцинаси, шунингдек, Pfizer ва BioNTech ишлаб чиқаётган вакцина синовида эса кўнгиллиларга эмлашдан кейин спиртли ичимликлар истеъмол қилмаслик бўйича кўрсатма йўқлиги айтилган. Британиядаги Imperial College London вакцинаси клиник синовида қатнашган кўнгилли ҳам спиртли ичимликлардан сақланиш ҳақида огоҳлантириш берилмаганини таъкидлаган.

Янгиликлар