Moderna ўз вакцинасининг самарадорлиги 94 фоиз эканини маълум қилди

^{Фото: Pinterest}
Moderna ўз вакцинаси бўйича бирламчи тадқиқотлар натижаларини эълон қилди. Вакцина COVID-19’нинг олдини олишда 94,1 фоиз самарадорлигини кўрсатди. Бу ҳақда MedicalXpress портали 31 декабрь куни хабар берди.

Тадқиқотда 30 мингдан ортиқ киши иштирок этган. COVID-19 вакцинасини олган гуруҳда коронавирус касаллигининг белгилари 11 кишида қайд этилган. Бундан ташқари, плацебо гуруҳида 185 тадқиқот иштирокчилари касал бўлиб қолди. Бу вакцина коронавируснинг олдини олишда 94,1 фоиз самарадорлигини намойиш этди.

Шу билан бирга, COVID-19’нинг оғир шакллари фақат плацебо қабул қиладиган кўнгиллиларда кузатилган.

Шунингдек, компаниянинг таъкидлашича, иммунизацияга организмнинг жавоби ўртача даражада бўлган, олувчиларнинг тахминан ярми, айниқса, иккинчи дозадан сўнг чарчоқ, мушак, бўғим ва бош оғриғига дуч келган. Кўп ҳолларда, ушбу таъсирлар эмлашдан тахминан 15 соат ўтгач бошланган ва икки кундан кейин йўқ бўлган.

1 декабрь куни Moderna АҚШ Озиқ-овқат маҳсулотлари ва дори воситаларининг Санитар назорати бошқармасига (FDA) коронавирус вакцинасидан фавқулодда фойдаланиш учун ариза юборганини эълон қилганди. Аввалроқ унинг самарадорлиги дастлабки таҳлилда 94,1 фоиз, касалликнинг оғир шаклида эса 100 фоиз самарадорлик кўрсатгани маълум қилинганди.

Шу вақтгача АҚШ ҳамда Канада Moderna вакцинасидан фойдаланишни тасдиқлаган. «Замин» янгиликларини «Вконтакти»да кузатиб боринг